Batyr ataǵyna usynylǵan 133 qazaqstandyq maıdanger týraly kitap shyqty
NUR-SULTAN. QazAqparat - Búgin elordada belgili ǵalym Berik Ábdiǵalıulynyń «Umytylǵan qaharmandar» atty kitaby tanystyryldy. Bul jaıynda «Nur Otan» partııasy Tóraǵasynyń birinshi orynbasary Máýlen Áshimbaev Facebook-tegi paraqshasynda jazdy, dep habarlaıdy QazAqparat .
«Ekinshi dúnıejúzilik soǵysynda erligimen kózge túsip, SSSR batyry ataǵyna usynylsa da túrli sebepterge baılanysty tıisti nagradasyna qol jetkize almaǵan qaharmandar az emes. Olardyń qatarynda qazaqstandyqtardyń da bar ekeni belgili. Osy olqylyqtyń ornyn toltyrý maqsatynda belgili ǵalym, otanshyl azamat Berik Ábdiǵalıuly birazdan beri arnaıy zertteý jumystaryn júrgizip keledi. Ótken jyly osy ıgi iske «Nur Otan» partııasy da qoldaý kórsetip, qol ushyn sozǵan bolatyn. Sonyń nátıjesinde «Umytylǵan qaharmandar» atty kitap jaryq kórip, jańa týyndy búgin qalyń oqyrmanǵa jol tartty», - dep jazdy ol.
Onyń atap ótýinshe, jobanyń basty maqsaty - umyt qalǵan ardagerlerimizdiń esimderin dáriptep, olardyń erlikterin keńinen nasıhattaý, sol arqyly óskeleń urpaqty otansúıgishtikke baýlý. Bul - búgingi beıbit kúnimizdiń kepili bolǵan batyrlarymyzdyń aldyndaǵy bizdiń perzenttik boryshymyz.
«Kitapqa Batyr ataǵyna usynylǵan 133 qazaqstandyq maıdanger týraly málimetter engizilgen. Olardyń bári marapattaý paraqshasy tiziminen tabylǵan ardagerler. Degenmen, erlikteri eskerilse de, der kezinde elenbeı qalǵan batyrlarymyzdyń budan da kóp ekeni belgili. Sol sebepti «Nur Otan» partııasy osy baǵytta eńbektenip júrgen azamattarǵa qoldaý kórsetýdi odan ári jalǵastyra beredi. Búgin kópshilikke tanystyrylǵan jańa eńbek bizdiń aýqymdy jumysymyzdyń birinshi kezeńi ǵana. Kelesi kezeńde bastamanyń aıasyn keńeıtip, batyrlarymyzdyń esimderin mektepterge, kóshelerge jáne aýyldarǵa berý isin qolǵa alsaq degen josparymyz bar. Aldaǵy ýaqytta sol josparlarymyzdyń da júzege asatynyna senemiz», - dedi Máýlen Áshimbaev.
