«Batyr arýlar» baıqaýynyń jeńimpazdary jaýyngerlik synaq tapsyrýda (FOTO)

ASTANA. QazAqparat - «Batyr arýlar» baıqaýynyń jeńimpazdary ózderiniń naǵyz jaýynger ekenin dáleldeýde. Bul týraly QR Qorǵanys mınıstrliginiń Feısbýktegi paraqshasynda jarııa etildi.

«Batyr arýlar» baıqaýynyń maqsaty áıel áskerı qyzmetshiler arasyndaǵy eń sulýdy anyqtaý emes, názik jandylardyń jaýyngerlik ázirligin, rýhyn shyńdaý edi.

80-nen asa qatysýshylardan oq boıy ozyp shyqqan 12 áskerı qyz-kelinshek aq jaýlyqty ana, ıbaly kelin, aıaýly jar ǵana emes el qorǵaǵan «jaýynger» ekenin kezekti márte dáleldedi.
Jýyrda olar birneshe kúrdeli synaqtardan ótti.

Oq atyp, granata laqtyrdy. Sý bógetterinen júzip, parashıýtpen sekirdi. Kedergiler jolaǵynan múdirmeı ótti. Osylaısha, resmı marapattaýǵa deıin baıqaý fınalısteri dala jaǵdaıynda áskerı tásilder men jattyǵýlardy oryndady.

Aıta keteıik, qazirgi ýaqytta jeńimpazdar arnaıy fotosessııaǵa qatysýda. Olardyń beıneleri fotoalbomdar men kúntizbe paraqtaryna basylyp shyǵady.

Eske sala ketsek, baıqaýǵa ǵalamtorda daýys berý sáýirdiń 1-i men mamyrdyń 31-i aralyǵynda Qorǵanys mınıstrliginiń saıtynda júrgizildi. Bul ýaqyt ishinde úmitkerlerge 253 myń rekordtyq daýys berildi.

«Batyr arýlar» respýblıkalyq baıqaýynyń qatysýshylary - QR Qarýly Kúshteriniń áıel áskerı qyzmetshileri, ózindik eksperıment ótkizip, «olardyń balalary kózderi baılaýly kúıinde óz analaryn taba ala ma, álde joq pa?» degen suraqtyń jaýabyn izdep kórgen bolatyn.