«Batyr arýlar» baıqaýyna qatysýshylar astanalyqtarǵa arnap erekshe aktsııa ótkizdi (FOTO)
«Mega Astana» saýda oıyn-saýyq ortalyǵynyń ekinshi qabatynda batyr arýlarymyz astanalyqtardy Naýryz meıramymen quttyqtady, dep habarlaıdy QR Qorǵanys mınıstrliginiń baspasóz qyzmetinen.
Dástúr boıynsha bul kúni ár úıde merekelik dastarhan jaıylady. «Batyr arýlar» baıqaýyna qatysýshylar merekelik dástúrdi saqtaı otyryp, saýda oıyn-saýyq ortalyǵyna kelýshilerge baýyrsaq jáne basqa da ulttyq taǵamdardan dám usyndy. Sondaı-aq QR Qarýly Kúshterdiń atynan Naýryz meıramymen quttyqtaǵan estelik hattaryn taratty. Esterińizge sala ketsek, Qazaqstan Respýblıkasy Qorǵanys mınıstrliginiń bastamasy boıynsha áskerı qyzmetshi qyz-kelinshekter arasynda «Batyr arýlar» baıqaýy ótkizilýde. Onyń aıasynda daýys berý nátıjesi boıynsha QR Qarýly Kúshterdiń kásibı túrine qaraı 12 úzdik áskerı qyz-kelinshek anyqtalady. Jeńimpazdar 2016 jylǵa arnalǵan «Batyr arýlar» arnaıy kúntizbesine shyǵarý úshin kásibı fotosessııaǵa qatysýǵa múmkindik alady.