«Batyr arýlar» baıqaýy qatysýshylary júktelgen tapsyrmalardy múltiksiz oryndaıtyndyqtaryn dáleldedi - QR QM (FOTO)

ASTANA. QazAqparat - «Batyr arýlar» baıqaýy qatysýshylarynyń daıyndyǵy aıaqtaldy. Onyń barysynda áıel áskerı qyzmetshiler tózimdilik kýrsyn, lańkestikke qarsy operatsııany, jaý bekinisterin shabýyldaý, avtomattar men tapanshalardan oq atý, Kalashnıkov avtomatyn bólshekteý jáne qurastyrý kýrsynan ótti, dep habarlaıdy QR Qorǵanys mınıstrliginiń baspasóz qyzmeti.

«Batyr arýlar» is júzinde jaýyngerlik ázirliktiń barlyq daǵdylaryn meńgergendikterin kórsetti.

Tanktiń astynda jatý, kedergiler jolaǵyn buzyp ótý, jaýyngerlik qarýdan oq atý jaýyngerlik daıarlyqty tekserý kezeńine kirdi. Baıqaýǵa qatysýshylar atys qarýynyń úlgilerin ınjenerlik turǵyda bilý jáne atys mashyǵyn, jaýyngerlik jaraqtandyrýda kedergiler jolaǵyn eńserý kezindegi shydamdylyqty, «Kobra» brondy mashınasyn basqarý sheberligin pash etti. Qyz-kelinshekter úshin eń eleýli synaq tanktiń astynda jatý boldy. Bul jattyǵý áskerı qyzmetshilerdiń psıhologııalyq daıyndyǵyn tekserdi. Alaıda, «Batyr arýlar» jeńimpazdary shamaly tolqýǵa qaramastan, QR QK shyn mánindegi áskerı qyzmetshileri retinde bul synaqty da baǵyndyrdy.

Sońǵy synaqtardyń biri sýda jattyqtyrý is-qımyldaryn qarqyndy pysyqtaý boldy. Áıel áskerı qyzmetshiler tolyq jaýyngerlik amýnıtsııada júzip ótti jáne ýaqytqa belgili bir qashyqtyqty baǵyndyrdy. Qatysýshylardyń tapsyrmasy qarý áskerı qyzmetshilerdiń ózimen birge bolýymen kúrdelene tústi.

Baıqaý jeńimpazdaryn resmı marapattaýǵa deıin az ýaqyt qalǵanyn eske sala keteıik. Áskerı qyzmetshiler udaıy jaýyngerlik ázirlikte, olarǵa júktelgen tapsyrmalardy árqashan múltiksiz oryndaıtyndaryn dáleldedi.