«Batyr arýlar» astanalyqtarǵa arnap 1998 tátti toqash pisirdi (FOTO)

ASTANA. QazAqparat - Qazaqstannyń eń sulý áskerı áıelderi "Han Shatyr" ortalyǵynda astanalyqtarǵa arnap dastarhan jaıdy. "Batyr arýlar" baıqaýynyń jeńimpazdary qala qonaqtary men turǵyndaryna arnap óz qoldarymen áskerı sımvolıkasy bar tátti toqashtar tartý etti. Barlyǵy 1998 toqash pisirilgen. Bul elordanyń Astanaǵa kóshirilgen jylyn bildiredi.

"Bizdiń shara Astana kúnine jáne Prezıdentimizdiń týǵan kúnine arnalyp otyr. "Batyr arýlar" baıqaýynyń jeńimpazdary osylaısha qala turǵyndaryn Qorǵanys mınıstrliginiń atynan quttyqtaǵymyz keldi. Osy maqsatta elordalyqtar merekeni sezinsin dep, biz keń dastarhan jaıyp, osyndaı táttiler daıyndadyq", - deıdi "Batyr arýlar" baıqaýy jeńimpazdarynyń biri, Qorǵanys mınıstrligi áskerı polıtsııa bas basqarmasynyń qyzmetkeri Áıgerim Qarakúshikova.

Onyń aıtýynsha, toqashtar arnaıy retseptpen daıyndalǵan.

"Bizde bul tátti toqashtardy qalaı bezendiremiz degen kóp oılar boldy. Sońynda áskerı atrıbýtıka bolǵany durys dep sheshtik. Ár toqashta ár túrli - birinde juldyzdar bolsa, birinde tankiler jáne qarýdyń sýretteri jasalǵan. Jasyl men sary boıalaýlarmen kómkerilgen. Olardyń barlyǵy Báıterektiń - Astananyń sımvolymen biriktirildi. Osylaısha, biz áskerı taqyrypty jáne Astana kúnin bir arnaǵa toǵystyra aldyq", - deıdi ol.

Shara barysynda QR Qorǵanys mınıstrligi Ortalyq áskerı ansambliniń solısteriniń qatysýymen kontserttik baǵdarlama uıymdastyryldy. Eske sala keteıik, QR Qorǵanys mınıstrliginiń bastamasymen áskerı áıelder arasynda "Batyr arýlar" atty baıqaý ótken bolatyn. Onyń qorytyndysynda QR Qarýly kúshterinde qyzmet atqaratyn 12 názik jandy óz kásibiniń úzdikteri dep tanyldy.