«Batyl Júrek» fılmi Qazaqstanda 21 maýsym kúni qazaq jáne orys tilderinde kórsetile bastaıdy
ASTANA. 12 maýsym. QazAqparat - Ánshi Maqpal Isabekova Disney/Pixar stýdııasynyń Qazaqstan kınoteatrlarynda qazaq jáne orys tilderinde kórsetiletin «Batyl júrek» anımatsııalyq fılminde eki ándi oryndady.
Fılmniń qazaqsha nusqasyn shyǵarý jobasyn «Bolashaq» Qaýymdastyǵy, «Altyn qyran» qory jáne Marwin brendimen «Meloman» kompanııasy júzege asyrdy.
«Batyl Júrek» -Disney/Pixar stýdııasynyń qazaq tilinde shyǵatyn ekinshi anımatsııalyq fılmi. 2011 jyldyń maýsym aıynda kórsetilgen «Kólikter 2» sekildi bul fılm de avtordyń oıyn dál jetkizý úshin mátin aǵylshyn tilinen tikeleı qazaq tiline aýdaryldy Aýdarylǵan dıalogtardy, sonymen qatar, keıipkerlerdiń erinderiniń qımylyna beıimdeý qajet boldy. Fılmdi kórgende keıipkerler qazaq tilinde sóılep turǵandaı bolyp kórinedi. Keıipkerlerdiń sózderi men sóılemderiniń uzaqtyǵy men maǵynasyn saqtaý máselesin de sheshý qajet boldy.
«Mátinmen jumys isteý barysynda aǵylshyn tilinde akterlerdiń tez sóıleıtindigine tap boldyq. Nátıjesinde aǵylshyn tilindegi 3 sózdiń ornyna qazaq tilinde bir sóz engize alǵan jaǵdaılar boldy. Keı jerlerde aǵylshyn tilindegi sózder qazaq tildi nusqasynan alyp tastaldy (sóılemniń maǵynasy men fılmniń dramatýrgııasyna teris áser etpegen jaǵdaıda)», - deıdi mátin redaktory Saltanat Erkin.
«Qazaq tilinde keıipkerlerdi dybystaýdy árdaıym qyzyq dep oılaıtynmyn. Qatelespeppin. Stýdııada jumys isteý maǵan óte unady. Endi meniń daýsymmen qazaq tilinde Anjelına Djolı nemese Rız Ýızerspýn sekildi juldyzdardyń sóıleýin armandaımyn - deıdi Maqpal Isabekova. - Dybystaý barysynda aǵylshyn tildi nusqasynyń maǵynasyn, ıntonatsııasyn jáne keıipkerlerdiń minez-qulyqtaryn saqtaýymyz qajet boldy. Jumystyń qıyndyǵy da, qyzyqtyǵy da osy».
Dýblıaj jumystary 1-12 mamyr kúnderi aralyǵynda Almaty qalasyndaǵy Cinema Tone Production stýdııasynda júrgizildi. Jobanyń júzege asyrylýyna Qazaqstan, AQSh, Ulybrıtanııa, Reseı elderiniń mamandary qatysty. Jobanyń bas demeýshisi - «Altyn Qyran» qory. Fılmniń qazaq tildi nusqasyn shyǵarý bıýdjeti - 19 mıllıon teńge.
«Batyl Júrek» fılmi Qazaqstannyń kınoteatrlarynda 21 maýsym kúni qazaq jáne orys tilderinde kórsetile bastaıdy.
