Batýttyq gımnastıkadan ACh: Qazaqstandyqtar altyn jáne qola júldeni qanjyǵalady
ASTANA. QazAqparat - Qazaqstandyq Pırmammad Alıev batýttyq gımnastıka boıynsha ótken Azııa Chempıonatynda altyn medal aldy, dep habarlaıdy QazAqparat QR MSM Sport jáne dene shynyqtyrý isteri komıtetiniń baspasóz qyzmetine silteme jasap.
Bul synda ekinshi oryndy soltústik Koreıalyq sportshy ıelense, qola medal taǵy bir qazaqstandyq sportshy Danııar Túsipovke buıyrdy.
Al jasóspirim sportshy qyzdar Tatıana Gromovskaıa jáne Ekaterına Lýkına osy jyly qazannyń 6-18 aralyǵynda Argentına astanasy Býenos Aıreste Jasóspirimder arasynda ótetin Olımpıadaǵa joldama aldy.
Aıta keteıik, 17-20 mamyr aralyǵynda Fılıppın astanasy Manılada batýttyq gımnastıkadan IV Azııa Chempıonaty ótti. Oǵan 10 memleketten sportshylar qatysty. Qazaqstan Ulttyq quramasy sapynda 7 sportshy baq synady. Bul chempıonatta komandalyq nátıjeler eseptelmedi, tek sportshylardyń jeke óner kórsetýleri ǵana eskerildi.
