Batýttardy sanap jatyrmyz - Tótenshe jaǵdaılar komıtetiniń tóraǵasy
NUR-SULTAN. QazAqparat - Qazaqstanda kóshede ornatylǵan batýttardyń sany anyqtalyp jatyr. Bul týraly búgin QR ІІM-de ótken baspasóz máslıhatynda Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat tilshisi.
«Biz batýttardyń esebi men baqylaýǵa alý jumysyn qatań túrde qolǵa aldyq. Onyń ústine, ótken aptada mınıstrdiń elimiz boıynsha balalarǵa arnalǵan oıyn alańdaryn tekserý jáne onyń ıelerine qaýipsizdik erejelerin túsindirý týraly buıryǵy shyqty. Atalǵa buıryqtyń negizinde barlyq attraktsıondar men batýttardy sanap jatyrmyz. Keshegi kúnniń esebi boıynsha barlyǵy 339 balalar attraktsıony tekserildi, onyń ishinde 84-i - statsıonarly, 254-i - úrlemeli batýt. Bul árıne aqyrǵy tsıfr emes, jumys jalǵasýda», - dedi V. Bekker.
Sondaı-aq, komıtet basshysy óńirlerdegi ornatylǵan batýttar sanyna jekeleı toqtalyp ótti.
«Oblystar boıynsha aıtar bolsaq, Qaraǵandy oblysynda - 63, Almaty oblysynda - 30, ShQO - 24, BQO - 23, Qyzylorda oblysynda - 21, Pavlodar oblysynda - 15, Nur-Sultan qalasynda -10 jáne Almaty qalasynda 17 batýt bar. Qalǵan óńirlerdegi batýttardyń sany 10-ǵa jetpeıdi. Qaıta eske salǵym keledi, Qazaqstandaǵy barlyq batýt sanalyp bitken joq. Onyń ústine, jaz maýsymy endi ǵana bastaldy, sondyqtan bul san ósedi dep oılaımyn. Osy aıdyń sońynda batýttarǵa qatysty tolyq aqparatty jarııa etetin bolamyz», - dedi ol.
Eske salaıyq, keshe QR ІІM Tótenshe jaǵdaılar komıtetiniń tóraǵasy Vladımır Bekker batýttardyń qaýipsizdigin baqylaý máselesi qalaı rettelip jatqanyn aıtyp berdi. Ol qaıǵyly oqıǵalarǵa ákep soqtyratyn birneshe sebepti atady.
