Batýt problemasy búgin ǵana paıda bolǵan joq - komıtet tóraǵasy
NUR-SULTAN. QazAqparat - Tótensha jaǵdaılar komıtetiniń tóraǵasy Vladımır Bekkerdiń pikirinshe, batýttar máselesi jyldar boıy qordalanǵan kemshilikterden jınaqtalǵan, dep habarlaıdy QazAqparat tilshisi.
Komıtet tóraǵasy sońǵy birneshe kúnniń ishinde bolǵan tótenshe oqıǵalar boıynsha BAQ ókilderine aqparat berdi. Onyń sózinshe, oqys oqıǵalardyń eleýli bóligi túrli nysandarda qaýipsizdik sharalary jertkilikti deńgeıde saqtalmaýynan bolyp otyr. Sonymen qatar, Vladımır Bekker batýttardyń jaǵdaıyna da toqtaldy.
«Batýt máselesi búgin nemese keshe paıda bola qalǵan joq. Buǵan deıin qansha dabyl qaqsaq ta, durys nazar aýdarylmaı keldi. Byltyr osyǵan baılanysty 9 oqıǵa tirkeldi, shýladyq ta umyttyq. Bıyl qaıǵyly jaǵdaı bolyp taǵy dabyl qaǵyldy. Biraq solardyń jumys tártibin retteıtin tetik áli qabyldanǵan joq», deıdi komıtet basshysy.
Onyń aıtýynsha, eldegi batýttan basqa da túrli oıyn atraktsıondarynyń qaýipsizdik talaptaryna sáıkestigi shamaly.
«Batýt qana emes, jalpy atraktsıondar boıynsha kóptegen másele bar. Ótken aptada ǵana Semeıde átkenshek qulap, birneshe bala jaraqat aldy. Ondaı qaýipti atraktsıondar kóbeıgen ústine kóbeıip jatyr. Ótken aptada Qostanaıda batýttyń jyrtyǵyna bala qulap qaldy. Eń ókinishtisi, áıel jyrtyqty balasyn jibermeı turyp kóredi de, bizge habarlap, tesikti jastyqpen bitep qoıǵanyn kórsetken. Árıne ol shaǵym boıynsha tekseris júrgizdik. Polıtsııa qylmystyq is qozǵap jatyr. Ata-analar balalaryn qydyrtpas buryn qaıda apara jatqanyn oılansa eken», - dedi komıtet ókili.
