Batý han týraly tarıhı roman jazylyp jatyr

ASTANA. KAZINFORM – Altyn Ordanyń negizin qalaǵan tulǵalardyń biri, Shyńǵys hannyń dańqty nemeresi Batý han týraly tarıhı roman jazylyp jatyr. Bul týraly Astanada oqyrmandarmen kezdesken jazýshy, «Joshy han» tarıhı romanynyń avtory Ularbek Dáleıuly aıtyp berdi.

Avtor «Joshy han» romanyn jazýǵa daıyndyq barysynda tórt jylǵa sozylǵan zertteý eńbekteriniń negizinde Shyńǵys zamany jaıly tereń jáne tyń derekterdiń izine túsken.

– Osy kitaptan keıin, araǵa azdap úzilis tastap, jınalǵan tarıhı derekter negizinde «Joshy han» tarıhı-derekti romanynyń jalǵasy ispetti «Batý han» romanyn jazýǵa otyrǵan edim. Buıyrsa, aldaǵy qarasha aıynda oqyrmanǵa jol tartady degen úmit pen jospar bar. «Folıant» baspasymen kelisimshartqa otyryp, redaktsııalyq jumystary bastalyp ta ketti. Bul roman da áýelgi baǵytym boıynsha tarıhı-derekti dúnıe. Odan sonshama bir kórkemdik pen qııal izdep áýre bolýdyń keregi shamaly der edim. Oqyrmandardyń talabyn eskere otyryp, kóp sózge boı aldyrmaı, múmkindiginshe syǵymdap jazýǵa tyrystym. Naqty tarıhı qujattar men derekterge, anyq tańbaǵa túsken jazbalarǵa negizdelgen soń, «roman jazǵannyń jóni osy» dep artyq qııalǵa boı uryp, shyn tarıhtan alshaqtap ketýdi jón kórmedim. Baǵasyn patsha kóńil oqyrmanym ózi berer, – deıdi jazýshy.

Ol, sonymen birge, aldaǵy ýaqytta osy jelimen tarıhı romandar serııasyn jazýdy jalǵastyratynyn aıtty.

– Joshy han negizin qalaǵan, Batý han irgesin keńeıtken Altyn Orda dáýirindegi dańqty handar týraly tarıhı romandar serııasyn jazýdy josparlaǵanmyn. Qazir sol oıǵa alǵan armanymdy júzege asyrý jolynda alǵa jyljyp kelemin, – deıdi Ularbek Dáleıuly.

Aıta keteıik, jazýshymen kezdesýdi MARWIN/Meloman saýda jelisi uıymdastyrdy. Buǵan deıin Altyn Orda týraly tarıhı serıaldyń aqtyq kadrlary túsirilip jatqanyn jazǵan edik.