Batystaǵy qýat júıesin elimizdiń biryńǵaı ulttyq energııa júıesimen biriktirý qajet — Prezıdent

ASTANA. KAZINFORM — Úkimet kelesi jyldyń sońyna deıin Ońtústiktegi elektr jelilerin damytý jobalaryn júzege asyrýy qajet. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Men Ulttyq quryltaı otyrysynda Úkimetke eki aıdyń ishinde «taza» kómir óndirisi boıynsha Ulttyq joba ázirleýdi tapsyrdym. Osy baǵytta Qytaıdyń tájirıbesin erekshe atap kórsetýge bolady. Olar «taza kómirden» jalpy kólemi 55 gıgavatt bolatyn 85 energetıkalyq blok salý jumysyn bastap ketti. Bul — álem boıynsha kómirden alynatyn energııa kózderiniń 90 paıyzy degen sóz. Bir sózben, kórshiles el shyn máninde tıimdi, ıaǵnı energetıkalyq qaýipsizdik jáne ekonomıkalyq ósim turǵysynan paıdaly sheshim qabyldap otyr, — dedi Qasym-Jomart Toqaev.

Memleket basshysy AQSh ta kómir ıgerý jáne ony paıdalaný saıasatyna kóshetinine nazar aýdartty.

— Jalpy, ulttyq elektr jelisiniń senimdi jumys isteýine basa nazar aýdarý qajet. Úkimetke kelesi jyldyń sońyna deıin Ońtústiktegi elektr jelilerin damytý jobalaryn júzege asyrý tapsyrylady. Sondaı-aq Batystaǵy qýat júıesin elimizdiń biryńǵaı ulttyq energııa júıesimen biriktirýi tıis. Zamanaýı tsıfrlyq tásilderdi engizbesek, elektr qýatyn únemdeý qıyn, energııa júıesiniń úzdiksiz jumys isteýi ekitalaı. Osy salada jasandy ıntellekt kómegimen onlaın-monıtorıng júrgizýdi jedel qolǵa alǵan jón, — dedi Prezıdent.

Buǵan deıin Prezıdent salyq júıesin jappaı tsıfrlandyrýǵa shuǵyl kirisken jón ekenin aıtqan edi.