Batysta brakonerlerden 8 tonnadan asa balyq pen 10 keli ýyldyryq tárkilendi
ATYRAÝ. KAZINFORM — Atyraý, Mańǵystaý jáne BQO-da eki aıǵa sozylǵan «Bekire-2026» aktsııasynyń nátıjesinde 1 239 quqyqbuzýshylyq anyqtalyp, zańsyz aınalymnan 8,4 tonnadan asa balyq alyndy.
Jaıyq-Kaspıı oblysaralyq basseındik balyq sharýashylyǵy ınspektsııasynyń basshysy Nurlybek Gaısınnyń aıtýynsha, tárkilengen balyqtyń 1 tonna 235 kelisi bekire tuqymdas. 10 keliden astam bekire ýyldyryǵy anyqtalǵan. Sondaı-aq balyq aýlaýǵa paıdalanylǵan 1 237 dana aý quraly men 106 júzý quraly men kólik tárkilengen.
— Aktsııa barysynda ınspektsııa qyzmetkerleri polıtsııa jáne Shekara qyzmetimen birlesip, Jaıyq pen Qıǵash ózenderiniń krımınogendik ýchaskelerinde, sondaı-aq Kaspıı teńizi akvatorııasynda baqylaýdy kúsheıtti, — dedi Nurlybek Gaısın.
Balyq qorǵaý is-sharasy kezinde barlyǵy 1 239 quqyqbuzýshylyq anyqtalǵan. Onyń ishinde 936 azamat ákimshilik jaýapkershilikke tartylyp, 57 is sotqa joldanǵan. Quqyqbuzýshylarǵa jalpy somasy 25,9 mln teńge kóleminde aıyppul salynǵan. Inspektsııa basshysynyń málimetinshe, aktsııa aıasynda 33 qylmystyq is qozǵalǵan.
— Qazir quqyq buzýshylardan balyq resýrstaryna keltirilgen zalaldy óndirý jumystary júrgizilip jatyr. Aldyn ala esep boıynsha keltirilgen shyǵyn kólemi shamamen 890 mln teńgeni quraıdy, — dep tllyqtyrdy ınspektsııa basshysy.
Al Atyraý oblysynyń ózinde 4 tonna 941 keli balyq tárkilengen. Onyń ishinde 925 keli 300 gramy bekire tuqymdas balyq. Budan bólek, shamamen 1 keli bekire ýyldyryǵy, 26 balyq aýlaý quraly jáne 10 sý kóligi tárkilendi.
Al Atyraý oblystyq Polıtsııa departamenti Qoǵamdyq qaýipsizdik basqarmasy bastyǵynyń orynbasary Amanjan Jumalıev óńirde «Bekire-2026» jedel-profılaktıkalyq is-sharasy kezinde 236 quqyq buzýshylyq anyqtalǵanyn aıtty.
— Onyń 222-si zańsyz balyq aýlaý jáne balyq aýlaý qaǵıdalaryn buzý derekterine qatysty. Sonymen qatar 12 fakt balyq pen balyq ónimderin zańsyz tasymaldaý jáne áketý boıynsha tirkeldi, — dedi Amanjan Jumalıev.
Aktsııa qorytyndysy boıynsha Atyraý oblysynda Qazaqstan Respýblıkasy Qylmystyq kodeksiniń 339 baby (Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen zańsyz aınalysý) boıynsha 10 qylmystyq is, 335 baby (Balyq resýrstaryn, basqa da sý janýarlaryn nemese ósimdikterin zańsyz alý)
boıynsha 1 qylmystyq is tirkeldi. Sonymen qatar Ákimshilik quqyq buzýshylyq týraly kodekstiń 383 babymen (Balyq aýlaý jáne balyq resýrstary men basqa da sý janýarlaryn qorǵaý qaǵıdalaryn buzý) 221 adam jaýapkershilikke tartyldy.
Buǵan deıin Mańǵystaýda ıtbalyqtar men bekire tuqymdas balyqtardyń óleksesi tabylǵanyn jazǵan edik.
