Batysta 34 adam jalǵan qurylysshylardyń áreketinen zardap shekti
ORAL. KAZINFORM – Oral qalalyq sotynda tórt jyl boıyna BQO jáne Atyraý turǵyndarynan jarty mıllıard teńgege jýyq qarjy jınap alyp, biraq úı salý boıynsha mindettemelerin oryndamaǵan qurylys salýshylarǵa qatysty qylmystyq is qaraldy.
BQO sotynyń baspasóz qyzmetinen málim etkenindeı, jábirlenýshiler burynnan bar baspanalaryn satyp, jaldamaly páterlerde turyp jatqandyqtan, bul aqshany taýnhaýstar qurylysyna salǵan. Biraq sottalýshylar aqshany alǵannan keıin ártúrli mekenjaılardaǵy qurylys-montaj jumystary bastalmaǵan nemese aıaqtalmaı qalǵan.
Sottan túsken málimetke qaraǵanda, sottalýshylar áleýmettik jelilerde, sondaı-aq ártúrli ınternet-platformalarda taýnhaýstar salý týraly habarlandyrý jarııalaǵan. Ózderin tabysty kásipkerler retinde kórsetken alaıaqtar is júzinde jer telimderi, ruqsattary men naqty múmkindikteri bolmasa da, jobalardy júzege asyrý qyzmetterin usynǵan. Olar klıentterden aqsha alyp, jasalǵan kelisim-sharttardyń senimdiligine azamattardy sendirgen.
Qurylys salýshylar úleskerlerdiń aqshasyna barlyǵy birneshe turǵyn úı keshenin salamyz dep ýáde berip, 500 mıllıon teńgege jýyq qarajatty ıemdenip, nysandardy salmaǵan.
Alaıaqtyqtan zardap shekken azamattar qurylys kelisim-sharttarynda kórsetilgen merzimde nemese odan keıin de páterlerin ala almaǵan.
Eki sottalýshy jábirlenýshilermen qarym-qatynastary azamattyq sıpatta bolǵanyn aıtyp, óz kinálaryn moıyndamady.
«Birinshi satydaǵy sot qurylys salýshylardy alaıaqtyq jasaǵany úshin kináli dep tanyp, uzaq merzimge (sáıkesinshe 7 jáne 6 jyl) bas bostandyǵynan aıyrýǵa úkim kesti, sondaı-aq jábirlenýshilerge keltirilgen shyǵyndy óteý týraly qaýly shyǵardy. Apellıatsııalyq satydaǵy sot olardyń kinási dáleldengen, árekettiń saralanýyn durys dep tanydy. Jábirlenýshilerdiń azamattyq talaptaryn durys sheship, sottalýshynyń biriniń jazasyn Qylmystyq kodekstiń 55-babynyń 2-bóligi boıynsha jazany jeńildetetin mán-jaılardyń bar ekenin eskere otyryp, 7 jyldan 6 jyl 8 aıǵa deıin qysqartty. Sot úkimi zańdy kúshine endi», dep habarlady vedomstvodan.
Eske sala keteıik, budan buryn BQO-da ákesin óltirgen turǵynnyń 10 jylǵa sottalǵanyn jazǵan bolatynbyz.
