Batysqazaqstandyq sportshylar bir jylda 974 medal jeńip aldy

ORAL. KAZINFORM — Batys Qazaqstanda oblys halqynyń 42,4 paıyzy nemese 294 myńnan astam adam sportpen turaqty aınalysady.

BQO dene shynyqtyrý jáne sport basqarmasynyń basshysy Baqdáýlet Sábıtovtiń óńirlik kommýnıkatsııalar qyzmeti alańynda ótken brıfıngte málim etkenindeı, bıyl óńir úshin basym sport túrleri aıqyndaldy. 

Baqdáýlet Maratulynyń sózine qaraǵanda, júrgizilgen taldaý nátıjesinde oblysta 22 basym sport túri bekitildi. Olar olımpıadalyq, qysqy, para jáne sýrdlımpıadalyq baǵyttardy qamtıdy. Atalǵan sport túrlerine júıeli qoldaý kórsetilip keledi.

— 2025 jyldyń maýsym aıynan bastap dene shynyqtyrý jáne sport týraly zańnamaǵa ózgerister engizildi. Soǵan sáıkes basym jáne joǵary jetistikti sport túrleri naqtylandy. Keıbir olımpıadalyq emes sport túrleri olımpıadalyq baǵyttarǵa aýystyryldy. Atap aıtqanda, paýerlıftıng aýyr atletıkaǵa, al grepplıng erkin kúres baǵytyna engizildi. Bul ózgerister oblystyń barlyq aýdandaryndaǵy olımpıadalyq jáne ulttyq sport túrlerine de qatysty, — deıdi B.Sábıtov.

Onyń aıtýynsha, sonymen birge tamyz aıynan bastap ulttyq qurama sapyna engen sportshylardyń aı saıynǵy aqshalaı tólemderi aılyq eseptik kórsetkishke baılanystyrylyp, aıtarlyqtaı artty.

Bıyl oblys sportshylary túrli deńgeıdegi jarystarda 352 altyn, 299 kúmis, 323 qola, barlyǵy 974 medal jeńip aldy. Onyń ishinde Azııa chempıonattarynda — 60, álem chempıonattary men halyqaralyq jarystarda 25 júlde bar.

Anastasııa Tımoshenkova, Fatıma Supyǵalıeva, Irına Ivanovskaıa, Marııa Brovkova, Zeınep Baıanova, Danııal Sábıt syndy sportshylar óńirdiń sporttyq brendine aınaldy. Oǵan qosa oblys quramasy alǵash ret «Aqbıdaı–2025» respýblıkalyq aýyldyq sport oıyndarynda jalpykomandalyq III orynǵa ıe bolyp, tarıhı tabysqa qol jetkizdi.

— Materıaldyq-tehnıkalyq bazany nyǵaıtý maqsatynda sport mektepteri zamanaýı qural-jabdyqtarmen qamtylyp, QADAM.AI tsıfrlyq júıesi engizilýde. Bul júıe sportshylardyń daıyndyǵyn taldaýǵa jáne jeke jattyǵý baǵdarlamalaryn ázirleýge múmkindik beredi. Aldaǵy josparlarymyzdyń qatarynda Jasóspirimder Olımpıadasy men Kóshpendiler oıyndaryna lıtsenzııa alý, ulttyq sport túrlerin damytý, sport ınfraqurylymyn jetildirý jáne turǵyndardy salaýatty ómir saltyna keńinen tartý bar. Bıyldan bastap úzdikter arnaıy reıtıng júıesi arqyly anyqtalady. Bul ereje «Keńesshi» sport ardagerleriniń qoǵamdyq birlestigimen birlese ázirlenip, 10 atalym boıynsha úzdikterdi anyqtaýǵa múmkindik beredi, — dedi basqarma basshysy.

Eske sala keteıik, budan buryn Oral qalasynda jańa stadıon salyna ma, sony jazǵan edik.