Batysqazaqstandyq kásipkerler sý tasqyny saldarynan 7 mlrd teńge shyǵynǵa ushyrady

ORAL. KAZINFORM – Sý tasqyny saldarynan batysqazaqstandyq kásipkerler aldyn ala málimet boıynsha 7 mlrd teńge shyǵynǵa ushyrady.

BQO kásipkerlik jáne ındýstrııalyq-ınnovatsııalyq damý basqarmasynyń basshysy Nurjan Ótepbaevtyń Kazinform tilshisine málim etkenindeı, oblysta 2024 jylǵy 22 sáýirdegi «2024 jylǵy sý tasqyny saldarynan shaǵyn jáne orta kásipkerlik sýbektilerine keltirilgen múliktik shyǵynǵa ótemaqy tóleý qaǵıdalaryn bekitý týraly» №18 erejege sáıkes jumys júrgizilip jatyr. Onyń sózine qaraǵanda, oblysta zalaldy óteý úshin óńirlik komıssııa quryldy.

«Kúni búginge deıin shaǵyn jáne orta bıznes nysandary ıelerinen 115 ótinish tússe, sonyń 9-y – Syrym, 8-i – Qaratóbe, 8-i – Bórli, 38-i – Terekti, 31-i – Báıterek aýdany, 21-i Oral qalasynyń úlesine tıedi. Keltirilgen zalal kólemi – aldyn ala esep boıynsha 7 mlrd teńge. Bul san áli naqtylanady. Atalǵan aýdandar men Oral qalasynda múlik ıesin sý tasqyny saldarynan zııan shekti dep taný úshin komıssııalar jumys istep jatyr», - dedi N.Ótepbaev.

Basqarma basshysynyń aıtýynsha, 4 mamyrda óńirlik komıssııanyń birinshi otyrysy ótkizilip, onda baǵalaýshy (10 mekeme) jáne tehnıkalyq tekserý (5) kompanııalarynyń tizimi bekitildi.

«Bekitilgen kompanııalar tizimi jergilikti atqarýshy organdardyń resmı ınternet kózderinde ornalastyryldy. Atalǵan jıynǵa sonymen qatar «Atameken» QR Ulttyq kásipkerler palatasy basqarma tóraǵasy Tımýr Naqypbekov pen QR Ulttyq ekonomıka mınıstrligi kásipkerlikti damytý departamentiniń dırektory Nurbol Jańabekov qatysyp, kásipkerlik sýbektilerine keltirilgen zalaldy anyqtaý jáne óteý tetikteri talqylanyp, ereje talaptary túsindirildi. Jumys sapary barysynda Tımýr Naqypbekov pen Nurbol Jańabekov sý basqan kásipkerlik nysandarynda boldy. Qazirgi tańda múliktik shyǵyndy óteý boıynsha ótinish berý úshin elektrondy portal (E-ótinish) jasaqtaldy. Ótinish berý nusqamasynyń vıdeosy basqarma saıtynda, sondaı-aq jergilikti atqarýshy organdardyń áleýmettik jelilerinde ornalastyryldy», - dedi Nurjan Ótepbaev.

BQO kásipkerler palatasynyń dırektory Maqsat Qulanbaev keltirilgen zalaldy esepteý jáne baǵalaý jumystarynyń júrgizilip jatqanyn jetkizdi.

«Kásipkerlerdiń ótinishi aıaqsyz qalmaıdy. Bári de qaralyp, sý tasqynynan zııan shekkeni rastalsa, ótemaqy tólenedi», - dedi M.Qulanbaev.

Eske sala keteıik, budan buryn Batys Qazaqstanda sý basqan aýmaqtarda epıdemıologııalyq ahýal turaqty ekendigin jazǵan bolatynbyz.