Batysqazaqstandyq dıqandar egin orýǵa kiristi
ORAL. KAZINFORM — Batys Qazaqstan oblysynda kúzdik bıdaı men arpany orý bastaldy.
BQO aýyl sharýashylyǵy basqarmasy basshysynyń orynbasary Berik Sıtqazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, bastapqy málimet boıynsha daqyldardyń ónimdiligi jaman emes.
Berik Maratulynyń sózine qaraǵanda, qazirgi tańda 520 gektar arpa men kúzdik bıdaıdan 1,6 myń tonna astyq alyndy. Ortasha ónimdilik — gektaryna 30 tsentner. Degenmen aýyl sharýashylyǵy daqyldarynyń ónimdiligi kópjyldyq ortasha deńgeıde bolady dep boljanyp otyr.
— Bıyl óńirde barlyǵy 633 myń gektarǵa aýyl sharýashylyǵy daqyldary egildi, bul jospardaǵydan (612,7 myń ga) joǵary. Sonyń ishinde 296,8 myńy — dándi daqyldar, munyń 91,5 myńy — kúzdik bıdaı, 121 myńy — maıly daqyldar, 4,2 myńy — kartop, kókónis-baqsha daqyldary, 211 myń gektary — mal azyqtyq daqyldar, — deıdi Berik Sıtqazıev.
Onyń aıtýynsha, qazirgi ýaqytta sharýalar erte pisetin kókónisterdi jınap jatyr.
Bıyl oblystyń aýyl sharýashylyǵy taýaryn óndirýshilerge kúzgi dala jumystaryn júrgizý úshin 11,8 myń tonna (shilde — 3,08 myń, tamyz — 3,92 myń, qyrkúıek — 4,3 myń, qazan — 0,52 myń tonna) arzandatylǵan dızel otyny bólindi.
— Kúni búginge deıin jetkizýshi operatordy anyqtaý maqsatynda konkýrs ótkizýge habarlandyrý berilip, komıssııa otyrysy 11 shildege belgilendi. Oǵan deıin kóktemgi dala jumystary kezinde ıgerilmegen 1,9 myń dızel otyny sharýalarǵa qaıta bólindi. 1 lıtr dızel otynynyń Oraldaǵy munaı bazalarynan jiberý baǵasy — 254 teńge. Sonymen qatar kúzgi dala jumystaryna tehnıkalar tolyq daıyn. Oǵan 5 312 traktor, 911 kombaın, 3711 tirkeme jáne ózge de tehnıkalar tartylady, — dedi basqarma basshysynyń orynbasary.
Onyń málimdeýinshe, qazirgi tańda egiske engiziletin tyńaıtqyshtar jetkizilip jatyr. Otandyq zaýyttardan jáne tyńaıtqysh satýshylardan barlyǵy 4,5 myń tonna tyńaıtqysh (52,7 paıyz) satyp alyndy. Kelisim-shartqa otyrý jumystary jalǵasyp jatyr, jol kartasy boıynsha jospar — 46,9 myń tonna.
Oblysta arnaıy lıtsenzııasy bar 8 astyq qabyldaý kásiporny ónimderdi qabyldap jatyr. Olardyń jalpy syıymdylyǵy — 586 myń tonna, bul jınalǵan ónimdi saqtaýǵa jetkilikti.
— Dıqandardy barlyq qajetti resýrspen qamtamasyz etý maqsatynda bıyl ósimdik sharýashylyǵyn sýbsıdııalaý men qyzmetter kórsetýge jergilikti bıýdjetten 2,6 mlrd teńge qaralsa, sonyń 595 mln teńgesi ıgerildi. Budan bólek, kóktemgi dala jáne egin orý jumystaryn nesıeleýge oblysqa 21,4 mlrd teńge, sonyń ishinde «Agrarlyq nesıe korporatsııasy» AQ arqyly 18,4 mlrd teńge, «AQJAIYQ» ÁKK» AQ-ǵa 3 mlrd teńge bólindi. Búginde sharýalarǵa 5 paıyzben 9,2 mlrd teńge (43 paıyz) nesıe berildi. 1,3 mlrd teńgege jýyq nesıeniń ótinimderi qaralyp jatyr, — dedi B.Sıtqazıev.
Eske sala keteıik, budan buryn shóleıt aımaqta qandaı shópten mol ónim alýǵa bolatynyn jazǵan edik.