Batysqazaqstandyq 79 jastaǵy parasportshy 80 shaqyrymdy jaıaý júrip ótti
ORAL. KAZINFORM – Batysqazaqstandyq parasportshy, 79 jastaǵy Qubaıdolla Hasanov Uly Jeńistiń 80 jyldyǵyna oraı Oral qalasynda 80 shaqyrymdyq mejeni baǵyndyrdy.
Aıaǵynan alǵan jaraqatyna qaramastan, úshinshi top múgedektigi bar Qubaıdolla Hamzauly segiz kún boıy «Aıgúl» shaǵynaýdanynan Jeńis alańyna deıin 10 shaqyrym júrip otyrdy.
Sporttyq sharany aıaqtaǵan soń Ekinshi dúnıejúzilik soǵysta mert bolǵan bozdaqtardyń rýhyna quran baǵyshtady.
BQO dene shynyqtyrý jáne sport basqarmasynyń basshysy Baqdáýlet Sábıtov ardager sportshyny arnaıy qabyldap, alǵysyn bildirdi.
— Qubaıdolla Hamzaulynyń bul bastamasy — keıingi jastar úshin úlgi. 1946 jyly Báıterek aýdany Petrov aýylynda dúnıege kelgen ardager ómirin sportqa arnap, salaýatty ómir saltyn nasıhattap keledi, — dedi B.Sábıtov.
Qubaıdolla Hasanov — para paýerlıftıngten eki dúrkin Azııa chempıony (2004 jyly — Úndistan, 2006 jyly — Fılıppın).
Óziniń sózine qaraǵanda, 1995 jyly qazaqtyń uly aqyny Abaıdyń 150 jyldyǵyna oraı 150 shaqyrym jaıaý júrgen. Bul joly jasy ulǵaıǵanyna qaramastan, Jeńistiń 80 jyldyǵyna oraı 80 shaqyrym júrýdi maqsat etken.
— Ardager aǵamyzdyń qasyna ilesip otyrdym. Ol qadam ólshegishti qosyp, kún saıyn 10 shaqyrymnan júrdi, — deıdi Oral qalasyndaǵy múgedekter sport klýbynyń dırektory Áskerbek Nurmuhanov.
Eske sala keteıik, budan buryn Jeńistiń 80 jyldyǵy qarsańynda aqyn Abdolla Jumaǵalıev týraly tyń derekter jarııa etilgenin jazǵan edik.