Batys jaǵalaýdaǵy aýyl sharýashylyǵyna mıllıon dollardan astam shyǵyn keldi
ASTANA. KAZINFORM – Izraıl áskeri men Palestına jerlerin basyp alǵan ızraıldik qonystanýshylardyń shabýyldary saldarynan ótken aptada 3 522 jemis aǵashy zaqymdanyp, aýyl sharýashylyǵyna tikeleı keltirilgen shyǵyn 1 mln 19 myń dollardan asty, dep habarlaıdy Kazinform agenttigi Anadolu agenttigine silteme jasap.
Palestına Aýyl sharýashylyǵy mınıstrliginiń 2026 jylǵy 8–15 qazan aralyǵyn qamtıtyn aptalyq esebine sáıkes, basyp alynǵan Batys jaǵalaýdyń ártúrli aýdandarynda jasalǵan shabýyldar negizinen záıtún jınaý naýqanyna baǵyttalǵan.
Shabýyldar saldarynan 2 667 záıtún aǵashy kesilgen, tamyrymen qoparylǵan, órtelgen nemese zaqymdanǵan.
Atalǵan kezeńde barlyǵy 3 522 jemis aǵashyna zııan keltirilip, aýyl sharýashylyǵyna kelgen materıaldyq shyǵyn 1 mln 19 myń dollardan asty. Myńdaǵan keli záıtún urlanyp, aýyl sharýashylyǵy tehnıkasy men sýarý jelileri joıylǵan.
Palestına jerlerin basyp alǵan ızraıldik qonystanýshylar urlaǵan záıtúnniń jalpy kólemi 8 612 kelige jetti.
Eń kóp zardap shekken aımaq — Batys jaǵalaýdyń ońtústigindegi Ál-Halıl aýdany. Ondaǵy shyǵyn shamamen 455 myń dollardy qurady. Odan keıin soltústiktegi Jánin qalasy tur. Bul óńirdegi shyǵyn shamamen 452 myń dollarǵa jetken.
Palestına jerlerin basyp alǵan ızraıldik qonystanýshylar záıtún jınap júrgen palestınalyqtarǵa, sondaı-aq osy aımaqta jumys istep júrgen jýrnalısterge jıi shabýyl jasaıdy.
Buǵan deıin Batys jaǵalaýda ızraıldik qonystanýshylardyń eýropalyq dıplomattarǵa shabýyl jasaǵany habarlanǵan bolatyn.
