Batys Trakııada Ramazan aıy baraban únimen bastaldy

ASTANA. KAZINFORM — Batys  Trakııa túrikteri Ramazan aıyn ǵasyrlardan kele jatqan baraban únimen qarsy aldy, dep habarlaıdy Anadoly.

Iskeche óńirindegi Shahın aýylynda dástúrli osman kıimin kıgen barabanshylar, negizinen balalar, besin namazynan keıin aýyl kóshelerin aralap, Ramazan aıynyń kelgenin jarııalady.

Baraban únimen úı-úıdi aralaǵan balalar aýylda merekelik kóńil kúı qalyptastyrdy.

Aýyl turǵyndary erekshe yqylaspen qarsy alǵan bul shara Ramazan aıynyń birlik pen yntymaq rýhyn nyǵaıtty.

Aýyl meshitinde oqylǵan duǵalarda turǵyndar Ramazan aıynyń ıslam álemi men Batys Trakııadaǵy túrik azshylyǵyna ıgilik ákelýin tiledi.

Sonymen qatar Batys Trakııada qyzmet atqaryp júrgen múftıler Ramazanǵa oraı úndeý jasap, musylmandardy qulshylyqty, birlik pen aýyzbirshilikti kúsheıtýge shaqyrdy.

Iskecheniń saılanǵan múftıi Mustafa Trampa óz úndeýinde Ramazannyń rýhanı mańyzyn atap ótip, bul qasıetti aı búkil ıslam álemi men adamzatqa beıbitshilik, tynyshtyq jáne jaqsylyq ákelsin degen tilegin bildirdi.

Ol Ramazan – Quran túse bastaǵan aı ekenin eske salyp, orazanyń sabyrdy, meıirimdilikti jáne jaýapkershilik sezimin nyǵaıtatynyn aıtty. Sonymen qatar, balalardy dinı jáne ulttyq qundylyqtar rýhynda tárbıeleýdiń mańyzdylyǵyna toqtalyp, ata-analardy osy máselege muqııat bolýǵa shaqyrdy.

Gıýmıýldjıneniń saılanǵan múftıi Ibragım Sherıf te óz joldaýynda Ramazannyń Batys Trakııadaǵy musylman túrik qaýymy ómirinde erekshe oryn alatynyn atap ótti.

Onyń aıtýynsha, Ramazan «on bir aıdyń sultany» retinde qabyldanady jáne bul aıda aýyzashar, sáresi, taraýıh namazy sııaqty qulshylyqtarmen qatar, ózara járdemdesý men yntymaq sezimi de kúsheıe túsedi.

Buǵan deıin London ortalyǵyndaǵy áıgili Koventrı-strıt qasıetti Ramazan aıyna oraı tórtinshi jyl qatarynan arnaıy jaryq shamdarymen bezendirilgenin jazǵan bolatynbyz.