«Batys» óńirlik qolbasshylyǵy qataryn jas ofıtserler tolyqtyrdy

ASTANA. KAZINFORM – «Batys» óńirlik qolbasshylyǵynda joǵary áskerı oqý oryndaryn aıaqtaǵan 24 túlek úshin oqý-ádistemelik jıyn uıymdastyryldy.

Joǵary oqý oryndarynda olar komandalyq-taktıkalyq motoatqyshtar, áýe-desanttyq, tank áskerleri, artıllerııa, áskerı barlaý, sondaı-aq tárbıe jumysy men áskerı psıhologııa baǵyttary boıynsha oqýdan ótti. Jas leıtenanttar vzvod komandırleri, batalondyq psıhologtar, rota komandırleriniń tárbıe jáne ıdeologııalyq jumys jónindegi orynbasarlary laýazymdaryna taǵaıyndalatyn bolady.

On kúndik oqý-ádistemelik jıyn teńiz jaıaý áskerleri brıgadasynyń bazasynda ótedi. Jas ofıtserler jaýyngerlik daıarlyq boıynsha sabaqtardy uıymdastyrý jáne ótkizý tártibin zerdeleıdi, qaraýyldar men áskerı narıadtar qyzmetiniń negizderi, sondaı-aq vzvodtardaǵy tárbıe jumysy boıynsha dárister tyńdaıdy. Bólimshelerdiń qyzmettik-jaýyngerlik qyzmetin retteıtin normatıvtik jáne basshylyq qujattarǵa erekshe nazar aýdarylady.

Qyzmetin endi bastaǵan komandırler jalpyáskerı jarǵylar, dene shynyqtyrý, taktıkalyq jáne atys daıyndyǵy boıynsha synaq tapsyrady. Nusqaýshylardyń aıtýynsha, leıtenanttar senimdi bilim men qyzmetke daıyndyqtyń joǵary deńgeıin kórsetýde.

– Ózimniń baısaldy kózqarasym bar. Bolashaqta óz isine laıyqty komandır bolǵym keledi. Bólimderde bizdi jaqsy qarsy aldy, qolbasshylyq bizdiń tez beıimdelýimiz úshin bárin jasap jatyr, – dedi Qurlyq áskerleri áskerı ınstıtýtynyń túlegi leıtenant Medet Serikbaev. 

Jas ofıtserler Atyraý, Aqtóbe, Aqtaý jáne Beıneý garnızondarynda qyzmet etetin bolady.