Batys Qazaqstannyń energetıkalyq áleýetin arttyrý jumystary júrgizilip jatyr
ORAL. KAZINFORM - Oral qalasynyń Juldyz shaǵynaýdanynda kerneýi 110/10 kılovolttyq jańa qosalqy stantsııanyń ashylý saltanaty ótti.
Saltanatty sharaǵa Batys Qazaqstan oblysynyń ákimi Narıman Tóreǵalıev qatysty.
Jańa ınfraqurylym nysany – qalanyń energetıkalyq áleýetin arttyratyn, turǵyndar ómiriniń sapasyn jaqsartýǵa baǵyttalǵan mańyzdy joba. Qosalqy stantsııanyń qurylysy 2024 jyly bastalyp, respýblıkalyq bıýdjetten 3,2 mlrd teńge jáne jergilikti bıýdjetten 190 mln teńge qarajat bólindi.
Qosalqy stantsııada eki kúshtik transformator, kerneýi 110 kılovolttyq 6 tizbekti áýe jelisi (uzyndyǵy 300 metr), 4 ankerli tirek, 5 kólikke arnalǵan avtoturaǵy bar jóndeý bazasy jáne ákimshilik-turmystyq korpýs salyndy.
Joba Juldyz, eski áýejaı jáne 6, 7, 8, 9, 10-shaǵynaýdandardaǵy turǵyndardy turaqty ári sapaly elektr qýatymen qamtamasyz etýge, sondaı-aq óndiristik aımaqtardyń elektrmen jabdyqtalý senimdiligin arttyrýǵa múmkindik beredi. Qosalqy stantsııada «Alageum Electric» qazaqstandyq óndirýshisiniń joǵary voltty zamanaýı jabdyqtary ornatylǵan.
Nysan tolyq iske qosylǵannan keıin «Batys Qazaqstan aımaqtyq elektr jelilik kompanııasy» JShS mamandary munda turaqty qyzmet atqaratyn bolady.
Іs-shara barysynda óńir basshysy merdiger uıym qyzmetkerlerine alǵysyn bildirip, jańa nysannyń el ıgiligine qyzmet etetinine senim bildirdi.
