Batys Qazaqstannyń áıelderi ádiletti Qazaqstannyń qurylysyna óz úlesterin qosýda
Keshe Batys Qazaqstan oblysynda «AMANAT» partııasy óńirlik fılıalynyń janynan Áıelder qanaty quryldy. Bul týraly partııa hatshysy Sholpan Karınovanyń jergilikti áıelder aktıvimen kezdesýi barysynda belgili boldy, dep habarlaıdy Kazinform «AMANAT» partııasy Batys Qazaqstan óńirlik fılıalynyń baspasóz qyzmetine silteme jasap.
Oblystyq Dostyq Úıiniń ǵımaratyna óńirdiń túkpir-túkpirinen 60-qa jýyq qatysýshy jınaldy. Іs-shara barysynda «AMANAT» partııasynyń Batys Qazaqstan oblystyq fılıaly janyndaǵy áıelder qanatynyń tóraǵasy bolyp Gaýhar Shaıhınııazova saılandy.
«AMANAT» partııasynyń hatshysy Sholpan Karınova atap ótkendeı, áıelderdiń memlekettik basqarýǵa jáne qoǵamdyq ómirge qatysýyn keńeıtý qajet.
«Qazirgi áıel tek qamqor ana ǵana emes, sonymen qatar tabysty bıznes-ledı, talantty ınjener, bir sózben aıtqanda, kez-kelgen saladaǵy kórnekti maman. Áıelder ádil Qazaqstannyń qurylysyna belsendi qatysady, onyń ár salada damýyna eleýli úles qosýda. Otbasy ınstıtýtyn, kóp balaly analardy qoldaý, genderlik teńdikti qamtamasyz etý – Memleket basshysy Qasym-Jomart Toqaev saıasatynyń jáne «AMANAT» partııasynyń saılaýaldy baǵdarlamasynyń mańyzdy basymdyqtary. Ol úshin biz ınklıýzıvti mádenıet pen genderlik parıtetti qalyptastyramyz, onda jalaqy men laýazymdar jynysqa emes, adamnyń kásibı daǵdylaryna qaraı bólinedi», – dedi ol.
Óz kezeginde Batys Qazaqstan oblysy ákiminiń orynbasary Baqytjan Narymbetov Oral halqynyń 51%-y áıelder quraıtynyn atap ótti.
«Bizdiń oblysta «Altyn alqa» jáne «Kúmis alqanyń» 7 myńǵa jýyq ıegeri bar. Sonymen qatar, barlyq ShOB sýbektileriniń taǵy da 51%-yn áıelder qurap otyr. Qazirgi qoǵamda genderlik teńdik barǵan saıyn mańyzdy prıntsıpke aınalýda. Áıelder er adamdardan tómen turýy qajet degen túsinik qazirdiń ózinde eskirip bara jatyr. Áıelder tek otbasylyq ómirde ǵana emes, saıasatta, bızneste, memlekettik qyzmette jáne basqa da kóptegen salalarda sheshýshi ról atqarady», – dedi ol.
Bul rette, Batys Qazaqstannyń áıelderi elimizdiń qoǵamdyq jáne saıası ómirinde erekshe belsendilik tanytýda, dep esepteıdi Batys Qazaqstan oblystyq máslıhatyndaǵy «AMANAT» partııasy fraktsııasynyń jetekshisi Sofıa Іzmuhambetova.
«Bizdiń óńirde «AMANAT» partııasynyń 27 myńǵa jýyq múshesi bar, onyń 17 myńy – áıel adamdar. Olar oń ózgeristerdiń ajyramas bóligine aınalýda. Olardyń belsendiligi aımaqtyń jáne búkil elimizdiń damýyna qundy úles qosýda. Áıelder kóshbasshylyǵy jaı ǵana qubylys emes, ádil Qazaqstandy qurýǵa arnalǵan qýatty qozǵaltqysh», – dedi ol.
Aıta ketý kerek, partııanyń bastamasymen áıelder qanaty jumysynyń 10 basymdyǵy atalyp, usynyldy, olardyń ishinde: otbasylyq-turmystyq zorlyq-zombylyqtyń aldyn-alýǵa járdemdesý, óndiristegi eńbekti qorǵaý, aýyldaǵy bıznes, otbasynyń densaýlyǵy men qundylyqtary, ekonomıkalyq quqyqtar, áıelderdiń ǵylymdaǵy róli jáne basqalar. Ár baǵyt boıynsha ózekti máselelerdi sheshý boıynsha óz kózqarastary men pikirlerin usynatyn saraptamalyq toptar jumys isteıtin bolady.
