BQO-ǵa Mańǵystaý men Almatydan qutqarýshylar kómekke jiberildi

ASTANA. KAZINFORM — Batys Qazaqstan oblysyna Mańǵystaý men Almatydan qutqarýshylar kómekke attandy. 

QR TJ mınıstrliginen málim etkenindeı, kóktemgi sý tasqynyna baılanysty avarııalyq-qutqarý jumystaryn júrgizýge járdemdesý úshin Batys Qazaqstanǵa Mańǵystaý oblysy TJD kúshteri men quraldary jiberildi.

Mınıstrliktiń Telegram kanalyndaǵy paraqshasynda jarııalanǵan beınejazbada mańǵystaýlyqtarǵa qyzmetterin abyroımen atqaryp, elge aman-saý oralý týraly tilek aıtylǵan. Osylaısha, aımaqtyń jedel qutqarý toby Batys Qazaqstan oblysyna ketti. 

Sondaı-aq Qorǵanys mınıstrliginiń áskerı-kóliktik avıatsııasy Almatydan QR TJM 28237-áskerı bóliminiń qyzmetshilerin tasymaldady. Qosymsha kúshter Batys Qazaqstan oblysyndaǵy sý tasqynynyń saldaryn joıýǵa baǵyttalady.

Eske sala keteıik, budan buryn Oral qalasynda tótenshe jaǵdaı jarııalanǵanyn jazǵan bolatynbyz. Sondaı-aq Batys Qazaqstan oblysynda 350-ge jýyq adam evakýatsııalandy.

BQO-nyń Qaratóbe, Terekti aýdandarynda tótenshe jaǵdaı jarııalandy.