Batys Qazaqstandaǵy zaýytty shıkizatpen qamtý máselesine Energetıka mınıstrligi pikir bildirdi
ASTANA. KAZINFORM — Batys Qazaqstan oblysyndaǵy «Kondensat» munaı óńdeý zaýytyna Reseıden shıkizat jetkizilýi toqtaýy múmkin degen aqparatqa baılanysty Energetıka mınıstrligi túsinikteme berdi.
Buǵan deıin birqatar buqaralyq aqparat quraldarynda Reseıdiń «Tatneft» kompanııasyna tıesili «TANEKO» munaı óńdeý zaýytyna jasalǵan shabýyldan keıin Qazaqstanǵa nafta men kondensat jetkizý úzilýi múmkin ekeni týraly aqparat taraǵan edi.
Reuters agenttiginiń málimetinshe, 12 maýsymda reseılik kompanııa osy oqıǵadan keıin zaýytta munaı óńdeýdi ýaqytsha toqtatatynyn jarııalady.
QR Energetıka mınıstrligi Kazinform tilshisiniń saýalyna bergen jaýabynda «Kondensat» AQ basshylyǵynyń málimetine silteme jasap, Batys Qazaqstan oblysyndaǵy kásiporyn jumysyn shtattyq rejımde jalǵastyryp jatqanyn, óndiristik protsesterdiń toqtamaǵanyn málimdedi.
- Qazirgi ýaqytta kásiporynǵa qajetti shıkizatty jetkizý bekitilgen kestege saı, úzdiksiz júzege asyrylyp jatyr. Otandyq zaýyttardy shıkizat resýrstarymen qamtamasyz etý máselesi QR Energetıka mınıstrliginiń turaqty baqylaýynda, — delingen vedomstvo habarlamasynda.
Eske sala ketsek, buǵan deıin Qazaqstannyń soltústik aımaqtaryn qamtý maqsatynda Reseıden 6,3 mıllıard tekshe metr gaz ımporttaý josparlanǵany habarlanǵan edi.
