Batys Qazaqstandaǵy sý qoımalary 77% toldy

ASTANA. KAZINFORM – Sý resýrstary jáne ırrıgatsııa mınıstrliginiń resmı ókili Móldir Ábdýalıeva ortalyq kommýnıkatsııalar qyzmetinde ótken brıfıngte eldegi sý qoımalarynyń jaǵdaıyna toqtaldy.

«Aqmola oblysynda eki iri sý qoımasy 100% toly. Munda sý tasqynynyń belsendi kezeńi ótip, salalary turaqtandy. Keshe tasqyn sýy «Alva» sýarý júıesiniń «Eski greıder» bógetinen asyp ketti. «Qazsýshardyń» jáne jergilikti turǵyndardyń kúshimen tasqyn toqtatylyp, Qaraótkel kentine tóngen qaýip seıildi. Soltústik Qazaqstan oblysynda 2 iri sý qoımasy 100% toly. Óńirde sý tasqyny jalǵasyp jatyr. Eki sý qoımasy da shtattyq kestege saı jumys istep tur, buzylý qaýpi joq. Sý toraptary kóp faktorly tekserýden ótti, nysandardyń tehnıkalyq jaǵdaıy qanaǵattanarlyq», - dedi ol.

Resmı ókil Esil ózeniniń Petropavl qalasynyń aýmaǵyndaǵy deńgeıi 1330 santımetrge jetip, bir táýlikte 27 santımetr kóterilgenin eske saldy.

«Aqtóbe oblysynda eki iri sý qoımasynyń ortasha sý jınaý kórsetkishi – 97%. Óńirdegi jaǵdaı turaqty. Shyǵys Qazaqstan oblysyndaǵy eki iri sý qoımasynyń ortasha sý jınaý kórsetkishi shamamen 80% boldy. Abaı oblysynda Shúlbi sý qoımasy 83% toldy. Óńirde sý tasqyny jalǵasyp otyr. Shúlbi sý qoımasyna sý jiberý jumysy jalǵasyp jatyr. Ertis qasbetiniń sý qoımalary shtattyq kestege saı jumys istep tur. Batys Qazaqstan oblysynda tórt iri sý qoımasynyń ortasha sý jınaý kórsetkishi – 77%. Irekli sý qoımasynan jiberilgen sý ázir Qazaqstan shekarasyna jetken joq. Bul sý 16-17 sáýirde keledi dep boljanyp otyr. Qaraǵandy oblysynda 3 iri sý qoımasy 98% toly, óńirde sý tasqynynyń belsendi kezeńi ótti. Jaǵdaı turaqty. Qostanaı oblysynda eki iri sý qoımasynyń ortasha sý jınaý kórsetkishi – 93%, munda sý tasqynynyń belsendi kezeńi ótti. Qaratomar sý qoımasy tranzıttik rejımde jumysyn jalǵastyrýda. Barlyq nysanda táýlik boıy kezekshilik jalǵasyp jatyr. Saǵat saıyn sý sharýashylyǵy jaǵdaıyna monıtorıng júrgiziledi», - dedi Móldir Ábdýalıeva.