Batys Qazaqstandaǵy Qaldyǵaıty ózeninde kópir qashan salynady
ORAL. KAZINFORM — Batys Qazaqstan oblysy Qaratóbe aýdanynda Qaldyǵaıty jáne Jaqsybaı ózenderinde kópir salý qajettiligi týyndap otyr.
Aýdan ortalyǵy Qaratóbe aýylynda turatyn eńbek ardageri Erkinbek Jánibekovtiń Kazinform tilshisine málim etkenindeı, kópirdiń joqtyǵynan jergilikti turǵyndar jyl saıyn zardap shegedi.
Onyń sózine qaraǵanda, aýdan qurylǵan 1928 jyldan bergi bir ǵasyrǵa jýyq ýaqyt ishinde Qaratóbe aýylynyń irgesimen aǵatyn Qaldyǵaıty ózeninde eshqashan kópir salynbaǵan. Bógetti tasqyn sý shaıyp ketedi.
— Jyl saıyn kóktemde Qaldyǵaıty tasyǵan kezde Aqqozy, Saraljyn, Qarakól aýyldyq okrýgteriniń 6 eldi mekenimen qatynas úziledi. Ol jaqta 5 myńǵa jýyq adam turady. Eger kópir salynsa, onyń kórshiles oblys turǵyndary úshin de mańyzy zor bolar edi. Atap aıtqanda, Atyraý oblysy Qyzylqoǵa aýdany jáne Aqtóbeniń Oıyl aýdany Jetikól aýylynyń halqy Oralmen Qaratóbe arqyly qatynaıdy, — deıdi Erkinbek Jánibekov.
Aqsaqaldyń aıtýynsha, Qaratóbe aýdanynyń jeri qumdy bolyp keledi. Sol sebepti arnasyn qum basqandyqtan, Qaldyǵaıty ózeni aýdan ortalyǵyna birte-birte jaqyndap keledi.
Qazirgi kezde óziniń úıine 70 metrdeı qashyqtyqta aǵyp jatyr.
— Taǵy bir kópir Jaqsybaı ózeninde Aqqozy aýyldyq okrýginiń ortalyǵy Qorjyn aýyly tusynda salynýy kerek. Ótken jyly Qorjyn aýylyn túgeldeı tasqyn sý basyp, jańadan 90 úı salynǵany belgili, — dedi eńbek ardageri.
Aýdan ákimi Qadyrjan Súıeýǵalıev eki kópir boıynsha da jobalyq-smetalyq qujattama jasalyp, saraptamadan ótkenin jetkizdi.
BQO jolaýshylar kóligi jáne avtomobıl joldary basqarmasynyń basshysy Marat Qýanshalıevtiń naqtylaýynsha, Qaldyǵaıty ózeni arqyly ótetin kópir qurylysyna qatysty memlekettik saraptamaǵa sáıkes joba quny — 2 mlrd 283,728 myń teńge.
— Sol sekildi Qorjyn kentindegi Jaqsybaı ózeni arqyly ótetin kópir qurylysyna joba boıynsha 2 mlrd 796 mln 529,3 myń teńge qajet. Qazirgi tańda bul jobalardy júzege asyrý maqsatynda qarajat bólý úshin bıýdjettik ótinim daıyndalyp jatyr, — dedi Marat Qýanshalıev.
Májilis depýtaty Nartaı Sársenǵalıev Batys Qazaqstan oblysyna jumys sapary kezinde qos kópir máselesimen tanysyp, onyń baqylaýda bolatynyn atap ótti.
Eske sala keteıik, budan buryn Batys Qazaqstanda sýǵa ketken aýyldan turǵyndar tikushaqpen evakýatsııalanyp jatqanyn jazǵan edik.
