Batys Qazaqstandaǵy aýylda jol nelikten salynbaı qaldy
ORAL. KAZINFORM — Aqjaıyq aýdany Taıpaq aýylynda aýylishilik joldyń bitpeı qalǵany jóninde áleýmettik jelide beınejazba tarady.
Qoǵam belsendisi Almagúl Iqsanovanyń málim etkenindeı, birneshe kóshede jol salynbaǵan.
— Merdiger asfalt tóseý jumystaryn júrgizbegen. Bordıýrlar shashylyp jatyr, qıyrshyq tas ydyrap ketken. Tehnıka tur, jol joq. Tipti aýrýhanaǵa qaraı da adamdardyń barýy qıyn. Ásirese, jasy kelgen turǵyndar shaǵymdanyp jatyr, — deıdi A.Iqsanova.
Taıpaq aýylynyń turǵyny Serik Omarov asfalt tóseý jumysynyń bıyldan qalǵanyn, aldaǵy jyly tolyqtaı aıaqtalǵany jón ekendigin jetkizdi.
Osyǵan oraı Kazinform tilshisi Aqjaıyq aýdany ákimdigine arnaıy saýal joldaǵan edi.
Ákimdikten túsken málimetke qaraǵanda, 2023 jyly Aqjaıyq aýdany Taıpaq aýylynyń aýylishilik joldaryn (Mahambet, D. Nurpeıisova, H.Chýrın, Jambyl, T.Jumalıev kósheleri) kúrdeli jóndeý boıynsha memlekettik satyp alý konkýrsy ótkizilip, «Oral joldary» JShS jeńimpaz retinde tanylǵan.
2023 jyldyń tamyz aıynda kelisim-shart jasalǵan. Joba quny –376 mln 197 myń teńge. Qurylys-montajdaý jumystarynyń merzimi — 6 aı. Saraptama qorytyndysy 2022 jyldyń 3 naýryzynda shyqqan.
Jóndeý jumystaryn júrgizý úshin 2023 jyly — 100 mln, 2024 jyly — 210,8 mln, 2025 jyly 65,3 mln teńge bólingen. Qarajat bólýine qaraı qosymsha kelisim-sharttar jasalǵan.
Alaıda tek 500 metrge asfalt jabyny tóselip, qurylys jumystary toqtap qalǵan. Merdiger mekememen hat almasý júrgizilgenimen, nátıje bolmaǵandyqtan, 2025 jyldyń 17 shildesinde Aqjaıyq aýdany turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi tarapynan sotqa talap aryz joldanǵan.
— BQO mamandandyrylǵan aýdanaralyq ekonomıkalyq sotynyń sheshimine sáıkes «Oral joldary» JShS-ne shart boıynsha jumystardy tolyǵymen aıaqtaý mindettelgen. Áıtse de jaýapker mekeme jumystardy erikti túrde oryndamaǵany úshin sot oryndaýshysyna atqarý paraǵy joldandy. Sonymen qatar merdigermen tıisti jumystar júrgizilmeýine baılanysty jasalǵan shart buzyldy. Igerilmegen qarajat kólemi — 46,5 mln teńge. Endigi kezekte merdiger mekemeni memlekettik satyp alýdyń josyqsyz qatysýshysy retinde taný týraly sotqa talap aryz joldanatyn bolady, — delingen resmı jaýapta.
Atalmysh bólim mamandarynyń aıtýynsha, jol jóndeý jumystaryn aıaqtaý úshin jańa merdigerdi anyqtaý maqsatynda jobalyq-smetalyq qujattamaǵa túzetýler engizildi. Kúni búgin joba saraptamadan ótkizilýde. Oń qorytyndysy alynǵannan keıin memlekettik satyp alý rásimderine kezek keledi. Sonyń nátıjesimen merdigerdi bıyl anyqtap, jumysty kelesi jyly jalǵastyrý kózdelip otyr. Sebebi qys jaqyndap qalǵandyqtan, asfalt tóseý múmkin emes.
Eske sala keteıik, budan buryn Batys Qazaqstanda joldyń shala-sharpy salynýyna baılanysty ákimdik jaýap bergenin jazǵan edik.
Sondaı-aq BQO turǵyny aýdan ortalyǵynda tursa da, jolǵa zárý ekendigin aıtty.