Batys Qazaqstandaǵy aýylda ortaq septık nelikten isten shyqty
ORAL. KAZINFORM — Batys Qazaqstan oblysy Báıterek aýdany Dostyq aýylynda ortaq septıktiń jumys istemeı turǵany jóninde áleýmettik jelide aqparat jarııalandy.
Aýyl turǵyndarynyń sózine qaraǵanda, septıktiń isten shyqqanyna jarty jyldaı ýaqyt bolǵan.
- Káriz sýlary syrtqa shyǵyp, jertóleler men baý-baqshalarǵa quıylýda, sasyq ıisten demalý múmkin emes. Adamdar las sýlardyń janymen júrýge májbúr. Bul aýmaqtyń sanıtarlyq tazalyǵyna da qaýip tóndirýde. Biz ákimdikke birneshe ret ótinish jasadyq, jaýap bireý – sorǵy isten shyqqan, eshteńe jasaı almaımyz. Biz qoǵam men jaýapty adamdardyń nazaryn osy máselege aýdaryp, naqty sharalardyń qabyldanýyn suraımyz, - deıdi turǵyndar.
Osy máselege oraı Kazinform tilshisi Báıterek aýdany ákimdigine arnaıy saýal joldaǵan edi.
Ákimdik málimetine qaraǵanda, sorǵynyń isten shyǵýynyń basty sebebi káriz júıesine jaıalyq, maılyq, qoldanylǵan mata jáne basqa turmystyq qaldyqtardyń túsýi bolyp tabylady. Bul jabdyqtyń isten shyǵýyna ákeledi.
- Káriz júıesine atalǵan zattardyń túsýine baılanysty sorǵyny únemi jóndep, aýystyrý eleýli qarjylyq shyǵyndardy qajet etedi. Sondyqtan káriz júıesin paıdalaný erejesin saqtap, oǵan turmystyq qaldyqtardyń túsýine jol bermeý qajet. Qazirgi kezde bári qalypty jumys istep tur, - delingen resmı jaýapta.
Eske sala keteıik, budan buryn BQO-da kirpish zaýytynyń jumysy nelikten toqtap qalǵanyn jazǵan edik.
