Batys Qazaqstanda joldy kútip ustamaǵany úshin 66 laýazymdy qyzmetker jaýapqa tartyldy

ORAL. KAZINFORM – Batys Qazaqstan oblysynda bıylǵy birinshi jartyjyldyqta 125 myńnan astam jol erejesin buzýshylyq anyqtaldy.

BQO polıtsııa departamenti ákimshilik polıtsııa basqarmasynyń bastyǵy, polıtsııa podpolkovnıgi Aleksandr Pleshakovtyń óńirlik kommýnıkatsııalar qyzmeti alańynda ótken brıfıngte málim etkenindeı, osy merzimde kólikti mas kúıinde aıdaǵan 740 júrgizýshi ustaldy. Sondaı-aq 9 myńnan astamy kólik quraldaryn paıdalaný erejesin buzǵan.

Onyń sózine qaraǵanda, 3 230 júrgizýshi baǵdarshamnyń qyzyl belgisine qaramastan, ótip ketken. 2,5 myńdaıy uıaly telefon paıdalanǵan. 59 myńnan astamy jyldamdyq rejımin saqtamaǵan.

A.Pleshakovtyń aıtýynsha, oǵan qosa belgilenbegen jerden joldan ótken 10 myńnan astam jaıaý júrginshi ákimshilik jaýapkershilikke tartyldy.

Birinshi jartyjyldyqtyń qorytyndysy boıynsha mas kúıinde rýlge otyrǵan 676 júrgizýshi, al sońǵy bes jylda 10 874 adam kólik júrgizý quqyǵynan aıyryldy. Sonyń ishinde buryn kólik júrgizý quqyǵynan aıyrylsa da, 87-si rýlge mas kúıinde qaıta otyrǵan, endi olarǵa qylmystyq jaýapkershilik qarastyrylǵan.

- Jol-kólik oqıǵalarynyń aldyn alý úshin joldy kútip ustaý mańyzdy. Osy baǵytta bıyl 1 250 tekserý júrgizilip, kemshilikterdi joıý úshin uıǵarymdar berildi. Joldy kútip ustamaǵany úshin 166 laýazymdy qyzmetker, sonyń ishinde 98 birinshi basshy ákimshilik jaýapkershilikke tartyldy, - dedi A.Pleshakov.

Eske sala keteıik, budan buryn Oralda túngi klýbqa kelýshilerge qol jumsaǵan 17 kúzet qyzmetkeri ustalǵanyn jazǵan edik.