Batys Qazaqstanda jol shala-sharpy salynǵan – ákimdik jaýap berdi

ORAL. KAZINFORM – Batys Qazaqstan oblysy Báıterek aýdany Darııan aýylyna kireberis joldyń jarym-jartylaı salynǵany jóninde áleýmettik jelide beınejazba jarııalandy.

Aýyl turǵynynyń málim etkenindeı, jańadan tóselgen asfalt talapqa saı kelmeıdi.

- Mine, qarańyz, asfalt joldyń jarty bóligine salynǵan da, ekinshi jartysyna tóselmegen. Joldyń keı tustary tarylyp ketken. Sondyqtan avtokólikterge joldan túsip júrýine týra keledi. Oǵan qosa asfalt úgitilip jatyr. Buǵan tıisti organdar qalaısha jol bergen? Alda jańbyr jaýady, qys kele jatyr. Tezdetip komıssııa quryp, sebebin anyqtap, kinálilerdi jaýapqa tartý kerek, - deıdi turǵyn. 

Osy máselege baılanysty Kazinform tilshisi Báıterek aýdany ákimdigine arnaıy saýal joldaǵan edi.

Aýdan ákiminiń orynbasary Erlan Toqsanbaevtyń aıtýynsha, qazirgi kezde Darııan aýylyna kireberis jolǵa aǵymdaǵy jóndeý júrgizilýde. 

Onyń sózine qaraǵanda, merdiger uıym «Vektor B» bolsa, kelisim-shart quny – 33 mln teńge. Kelisim-shart aıasynda joldyń shuńqyryn jóndep, 1,1 shaqyrymǵa qalyńdyǵy 4 sm, eni 6 metr asfalt tóseý kózdelgen. 

- Taıaý ýaqytta joldyń jıegi nyǵaıtylyp, belgi salynyp, kedir-budyry tegisteletin bolady. Jumystar aıaqtalǵan joq. Aǵymdaǵy jóndeý jol qabatyn turaqty ustaý, aqaýlyqtaryn túzeý maqsatynda júrgiziledi. Buǵan shuńqyrdy toltyrý, jarylǵan jerlerin jabý, jekelegen ýchaskelerge jańa asfalt tóseý kiredi, - dedi E.Toqsanbaev. 

«Jol aktıvteriniń ulttyq sapa ortalyǵy» RMK BQO fılıalynyń bólim basshysy Dáýren Ámirovtiń naqtylaýynsha, joldy aǵymdaǵy jóndeý bolǵandyqtan, tapsyrys berýshi kelisim-shartqa otyrmaǵan.

Eske sala keteıik, budan buryn BQO-da aýyl turǵyndary joldy bastady da, tastaǵany jóninde dabyl qaqqanyn jazǵan edik. 

Erlan Toqsanbaev bul baǵyt boıynsha merdiger mekeme óz qarjysy esebinen 3,7 shaqyrym jolǵa asfalt tósegenin jetkizdi.