Batys Qazaqstanda jol apattary saldarynan 50-den astam adam kóz jumdy

ORAL. KAZINFORM — Batys Qazaqstan oblysynda jol-kólik oqıǵalaryn azaıtý maqsatynda 15-30 qyrkúıek aralyǵynda respýblıkalyq «Qaýipsiz jol» jedel aldyn alý is-sharasy júrgizilip jatyr. 

BQO polıtsııa departamenti jergilikti polıtsııa qyzmeti basqarmasynyń bastyǵy, polıtsııa podpolkovnıgi Oljas Ibraıymovtyń óńirlik kommýnıkatsııalar qyzmeti alańynda ótken brıfıngte málim etkenindeı, atalmysh is-sharanyń jeti kúninde 2 300-den astam jol erejesin buzý deregi tirkeldi.

Oljas Ázimbekulynyń sózine qaraǵanda, sonyń ishinde mas kúıinde avtokólik aıdaǵan 32 júrgizýshiniń beseýi buryn kólik quralyn basqarý quqyǵynan aıyrylǵan. Bul bes adamǵa qatysty QR QK 346-babyna sáıkes qylmystyq is qozǵaldy. 

Sondaı-aq kólik quralyn basqarý quqyǵynan aıyrylǵanyna qaramastan, 26 júrgizýshi avtokólik rýline otyrǵan. 115-i uıaly telefondy paıdalansa, 40 júrgizýshi jolaýshylardy zańsyz tasymaldaǵan. 186-sy burylý kezinde tártip saqtamaǵan. Basqa da ereje buzýshylyqtar azaımaı otyr.

— Bıyl jyl basynan beri Batys Qazaqstan oblysynda 886 jol-kólik oqıǵasy tirkelip, sonyń saldarynan 52 adam qaza tapty. Myńnan astam adam túrli dene jaraqatyn aldy. Jol apattarynyń negizgi sebepteri jol qozǵalysy erejesin óreskel buzý bolyp qalyp otyr, — dedi Oljas Ibraıymov.

Eske sala keteıik, budan buryn mas kúıinde avtokólik aıdaǵan polıtsııa maıorynyń qyzmetinen qýylǵanyn jazǵan edik.