Batys Qazaqstanda jol apatynan júrgizýshi men jolaýshy kóz jumdy

ORAL. KAZINFORM — Batys Qazaqstan oblysynda jol apatynan eki adam qaza tapty.

BQO polıtsııa departamentiniń baspasóz qyzmetinen málim etkenindeı, oqıǵa 21 jeltoqsan kúni Chapaev-Jańaqala jolynda boldy. 

«VAZ-2110» jáne «Lada Prıora» avtokólikteri betpe-bet soqtyǵysty. Saldarynan «VAZ-2110» avtokóliginiń júrgizýshisi men jolaýshysy oqıǵa ornynda jan tapsyrdy. Sondaı-aq «VAZ-2110» avtokóliginde otyrǵan taǵy 2 adam jáne «Lada Prıoradaǵy» 2 jolaýshy aýrýhanaǵa jatqyzyldy. Qazirgi kezde atalǵan derek boıynsha sotqa deıingi tergeý amaldary júrgizilýde», dep habarlady vedomstvodan.

Buǵan deıin Jańaqala aýdanynda sońy ólimmen aıaqtalǵan taǵy bir jol-kólik oqıǵasy bolǵan edi. 7 jeltoqsan kúni keshkisin Jańaqala aýylynda júrgizýshi «VAZ-2114» avtokóligimen belgilenbegen jerden ótip bara jatqan eki jaıaý júrginshini qaǵyp ketti. Olardyń bireýi qaıtys bolsa, ekinshisi aýrýhanaǵa jatqyzyldy.

Atalmysh aýdan turǵyndary sońǵy kezde jol apattarynyń jıilep ketkenine alańdaýshylyq tanytyp otyr.

Eske sala keteıik, budan buryn BQO-da joǵalyp ketken 22 jastaǵy qyzdyń 7 saǵattan keıin daladan tabylǵanyn jazǵan bolatynbyz.