Batys Qazaqstanda jol apatynan úsh adam kóz jumdy

ORAL. KAZINFORM – Batys Qazaqstan oblysynda úsh adamnyń ólimine soqtyrǵan jol-kólik oqıǵasy boldy. 

BQO Polıtsııa departamentiniń baspasóz qyzmetinen málim etkenindeı, oqıǵa 16 jeltoqsan kúni saǵat 20.30 shamasynda Báıterek aýdany Volodar aýylynan 2 shaqyrym jerde boldy.

Aýdandyq mańyzy bar Oral-Kırsanov jolynyń 14-shaqyrymynda 1989 jylǵy júrgizýshi «KIA K5» avtokóliginiń rýline ıe bola almaı, qarsy betke shyǵyp ketken. Sodan keıin 1974 jylǵy júrgizýshi aıdap kele jatqan «VAZ-2104» avtokóligimen betpe-bet soqtyǵysýǵa jol bergen.

Jol apatynan «VAZ-2104» avtokóliginiń júrgizýshisi men eki jolaýshysy oqıǵa ornynda kóz jumdy. Osy kólikte otyrǵan taǵy bir jolaýshy túrli jaraqatpen Oraldaǵy qalalyq kópbeıindi aýrýhanaǵa jetkizildi.

- Avtokólikter arnaıy turaqqa qoıyldy. Atalǵan derek boıynsha QR QK 345-baby 4-bóligine sáıkes qylmystyq is qozǵaldy. «KIA K5» avtokóliginiń júrgizýshisi ýaqytsha ustaý ızolıatoryna qamaldy. Qazirgi kezde oqıǵanyń jaı-japsary anyqtalyp jatyr, - dep habarlady vedomstvodan.

Eske sala keteıik, budan buryn BQO-da taǵy bir adamnyń denesi tabylǵanyn jazǵan edik.