Batys Qazaqstanda jol apatynan tórt adam mert boldy
ORAL. KAZINFORM – Batys Qazaqstan oblysynda jol-kólik oqıǵasynan tórt adam qaza tapty.
BQO polıtsııa departamentiniń baspasóz qyzmetinen málim etkenindeı, oqıǵa 7 shilde kúni Aqjaıyq aýdany aýmaǵynda boldy.
«Saǵat 22.00-de Oral-Atyraý joly boıynda «GAZel» men «Toıota Kamrı» avtokólikteri soqtyǵysty. Jol apaty saldarynan «Toıota Kamrı» avtokóliginiń júrgizýshisi men úsh jolaýshysy oqıǵa ornynda kóz jumdy. «GAZel» avtokóliginiń júrgizýshisi zardap shekpegen. Atalǵan derek boıynsha QR QK 345-baby 4-bóligine sáıkes sotqa deıingi tergeý amaldary júrgizilýde», dep habarlady vedomstvodan.
Eske sala keteıik, budan buryn BQO-da Shalqar kóliniń jaǵasynda áıel adamǵa naızaǵaı túskenin jazǵan bolatynbyz.
Sondaı-aq Oralda bir kúnde eki bala kóp qabatty úıdiń terezesinen qulap ketti.
