Batys Qazaqstanda jol apatynan eki oqýshy kóz jumdy

ORAL. KAZINFORM — Batys Qazaqstan oblysynda jol-kólik oqıǵasynan eki jasóspirim qaza tapty.

BQO polıtsııa departamentiniń baspasóz qyzmetinen málim etkenindeı, oqıǵa 21 sáýir kúni Báıterek aýdany aýmaǵynda Peremetnyı-Beles jolynda boldy. Shamamen saǵat 11.00-de Jac N56 jáne «VAZ-2110» kólikteri soqtyǵysty. 

– Jol apatynan jeńil kóliktiń júrgizýshisi men jolaýshysy kóz jumdy. Jeńil avtokólikte 2008 jáne 2010 jylǵy jasóspirimder bolǵan. Qazirgi kezde qylmystyq is qozǵalyp, oqıǵanyń mán-jaıy anyqtalý ústinde. Polıtsııa departamenti mert bolǵandardyń otbasylaryna kóńil aıta otyryp, ata-analardyń balalarynyń qaýipsizdigine muqııat qaraýy kerektigin eske salady, - dep habarlady vedomstvodan. 

Turǵyndardyń sózine qaraǵanda, marqumdardyń biri 2008, ekinshisi 2010 jylǵy, ekeýi de – mektep oqýshylary. 

Eske sala keteıik, budan buryn Oralda jeńil kólik avtobýspen túıisip, 3 adam aýrýhanaǵa jatqyzylǵanyn jazǵan bolatynbyz.