Batys Qazaqstanda jol apatynan eki áıel adam kóz jumdy
ORAL. KAZINFORM — Batys Qazaqstan oblysynda adam ólimine soqtyrǵan jol-kólik oqıǵasy boldy.
BQO polıtsııa departamentiniń baspasóz qyzmetinen málim etkenindeı, 15 maýsym kúni shamamen saǵat 18.50-de Terekti-Aqsaı avtojolynyń 52-shaqyrymynda úsh avtokóliktiń qatysýymen jol apaty boldy.
Aldyn ala málimetke qaraǵanda, 1973 jylǵy júrgizýshi Toyota Prado avtokóligimen qarsy betke shyǵyp ketken. Saldarynan 1973 jylǵy júrgizýshi aıdap kele jatqan Volkswagen Tiguan avtokóligimen túıisýge jol bergen. Sodan keıin 1963 jylǵy júrgizýshi basqarǵan Toyota Land Cruiser 200 avtokóligimen soqtyǵysqan.
— Jol apaty saldarynan Toyota Prado avtokóliginde otyrǵan 1971 jáne 1974 jylǵy eki áıel alǵan jaraqattarynan oqıǵa ornynda qaıtys boldy. Aýrýhanaǵa jetkizilgen basqa da zardap shekkender bar. Atalǵan derek boıynsha QR QK 345-baby 4-bóligine sáıkes sotqa deıingi tergeý amaldary bastaldy. Qazirgi kezde oqıǵanyń mán-jaıy anyqtalý ústinde, — dep habarlady vedomstvodan.
Eske sala keteıik, budan buryn Batys Qazaqstanda úsh jasóspirimniń sýǵa ketip qalǵanyn jazǵan edik.
