Batys Qazaqstanda jol apatynan eki adam kóz jumdy

ORAL. KAZINFORM – Batys Qazaqstan oblysynda eki adamnyń ólimine soqtyrǵan jol-kólik oqıǵasy boldy.

BQO polıtsııa departamentiniń baspasóz qyzmetinen málim etkenindeı, oqıǵa 2 maýsym kúni shamamen saǵat 22.30-da jańa kópir mańyndaǵy Podstepnyı-Melovye gorkı aınalma jolynda boldy.

Júrgizýshi «Lada Kalınamen» qarsy betke shyǵyp ketip, «KamAZ» júk kóliginiń búıirine soǵylǵan. Sodan keıin toqtaı almaı, «DAF XF440» júk kóligimen betpe-bet túıisken.

- Jol apaty saldarynan jeńil kóliktiń júrgizýshisi oqıǵa ornynda kóz jumdy. Sol kólikte otyrǵan er adam Oral qalalyq kópbeıindi aýrýhanasynyń jansaqtaý bólimine jetkizildi. Ol 3 maýsym kúni esin jımastan qaıtys boldy. Qazirgi kezde QR QK 345-baby 4-bóligine sáıkes tergeý amaldary júrgizilýde. Oqıǵanyń mán-jaıy anyqtalý ústinde, - dep habarlady vedomstvodan. 

BQO densaýlyq saqtaý basqarmasy baspasóz qyzmetiniń naqtylaýynsha, atalǵan aýrýhanada jeńil kólik jolaýshysyna ota jasalǵanymen, búgin tańda kóz jumdy.

Eske sala keteıik, budan buryn BQO-da esirtki taratýmen aınalysqan qylmystyq top ustalǵanyn jazǵan bolatynbyz.