Batys Qazaqstanda jol apatynan 8 adam kóz jumdy
ORAL. KAZINFORM — Batys Qazaqstan oblysynda 8 adamnyń ólimine soqtyrǵan jol-kólik oqıǵasy boldy.
BQO polıtsııa departamentiniń baspasóz qyzmetinen málim etkenindeı, oqıǵa búgin oblystyq mańyzy bar Chapaev-Jańaqala-Saıqyn avtojolynyń 50-shaqyrymynda boldy.
Toyota Camry men Volkswagen Sharan avtokólikteri soqtyǵysyp, onyń bireýi órtenip ketti.
Jol apaty saldarynan 8 adam qaza taýyp, taǵy tórteýi aýrýhanaǵa jetkizildi. Osy derek boıynsha qylmystyq is qozǵaldy. Aldyn ala boljam boıynsha júrgizýshiniń biri qarsy baǵytqa shyǵyp ketken bolýy múmkin.
- Aýa raıy qalypty jáne jol jabyndysynyń jaǵdaıy qanaǵattanarlyq bolǵan, kórinis jaqsy, qozǵalysqa syrtqy kedergiler bolmaǵan. Oqıǵa ornynda tártip saqshylary, jedel tergeý toby jáne TJ departamentiniń qyzmetkerleri jumys isteýde. Jol apatynyń tolyq mán-jaıy tergeý aıasynda anyqtalatyn bolady. Polıtsııa departamenti jol qozǵalysy erejesin qatań saqtaý kerektigin, ásirese, adamdardy tasymaldaý kezinde kez kelgen buzýshylyqtyń jol qatysýshylarynyń ómiri men densaýlyǵyna tikeleı qaýip tóndiretinin eske salady, - dep habarlady vedomstvodan.
BQO densaýlyq saqtaý basqarmasy baspasóz qyzmetiniń naqtylaýynsha, jaraqat alǵan tórt adam Aqjaıyq aýdandyq aýrýhanasyna jetkizilgen. Jaǵdaılary ortasha aýyr. Medıtsınalyq tekserýler júrgizilip, patsıentter em qabyldaýda.
Eske sala keteıik, budan buryn Batys Qazaqstanda jol apatynan 6 adam zardap shekkenin jazǵan edik.