Batys Qazaqstanda joǵalyp ketken 18 jastaǵy jigit sharýa qojalyǵynan tabyldy
ORAL. KAZINFORM - Batys Qazaqstan oblysynda joǵalyp ketken 18 jastaǵy Igor Israılov búgin aman-esen tabyldy.
BQO polıtsııa departamentiniń baspasóz qyzmetinen málim etkenindeı, atalmysh turǵyn 6 maýsym kúni Báıterek aýdany Rýbejka aýylyndaǵy úıinen shyǵyp ketken edi.
«Terekti aýdany polıtsııa bóliminiń ýchaskelik ınspektorlary jigitti sharýa qojalyqtarynyń birinen tapty. Sharýa qojalyǵynyń basshysy Igordyń ózi kelip, jumysqa alýyn ótingenin jetkizdi. BQO polıtsııa departamenti jigitti izdeýge atsalysqan adamdardyń bárine alǵysyn bildiredi. Qazirgi kezde onyń jaǵdaıy jaqsy, ata-anasynyń qolyna tapsyryldy», dep habarlady vedomstvodan.
Eske sala keteıik, budan buryn BQO-da joǵalyp ketken 18 jastaǵy jigittiń tórt kúnnen beri tabylmaı jatqanyn jazǵan bolatynbyz.
Sondaı-aq 18 jastaǵy jigittiń joǵalyp ketýine baılanysty qylmystyq is qozǵaldy.
