Batys Qazaqstanda jylqylardyń ashtan ólip jatqany ras pa
ORAL. KAZINFORM — Batys Qazaqstan oblysynda jylqylardyń ólip jatqany jóninde áleýmettik jelide beınejazbalar tarady.
Sonymen qatar, turǵyndar bıelerdiń ish tastap jatqanyn da jarııalap jatyr. Olardyń sózine qaraǵanda, jylqy maly jerge muz qatyp, tebindeı almaǵandyqtan, osyndaı jaǵdaıǵa tap bolǵan. Ásirese, qyrdaǵy malǵa qıyn soqqan. Qystan aman alyp shyǵý úshin ıeleri jylqylardy Naryn qumyna qaraı aıdaýǵa májbúr boldy. Sondaı-aq qolǵa qarap qalǵan malǵa jem-shóp jetkizilip jatyr.
Jańaqala aýdanynyń ákimi Alpamys Kóshkinbaev negizinen ahýal turaqty ekendigin jetkizdi.
— Qys bolǵan soń mal shyǵyny azdap bar. Biraq dabyl qaǵatyndaı másele joq. Shóp qory tolyqtaı jetkilikti, — dedi A.Kóshkinbaev.
Jańaqala aýdandyq veterınarlyq stantsııasy dırektorynyń mindetin atqarýshy Meırambek Qadyrbekov usynǵan málimetke qaraǵanda, jylqynyń ólim-jitimge ushyraǵany jóninde aýyldyq okrýgter turǵyndarynan habarlama túsken.
— Jylqylarǵa salynǵan chıp jáne en tańbalary arqyly mal ıeleri anyqtaldy. Atap aıtqanda, Qyzyloba aýyldyq okrýginde 2, Pıatımarda 9, Jańaqalada 10, aýdan boıynsha barlyǵy 21 bas jylqy ólim-jitimge ushyrady. Bulardyń barlyǵy mal molasyna jetkizilip joıyldy. Bıologııalyq qaldyqtardy joıý týraly akt jasaldy. Jylqynyń ólý sebebi — sýǵa batyp ketý, álsizdikten nemese ashtyqtan. Asa qaýipti aýrý belgileri tirkelmedi, — delingen resmı málimette.
BQO veterınarııa basqarmasy basshysynyń orynbasary Nurqaıyr Qusaıynov jylqynyń aýrýdan emes, kóteremdikten shyǵynǵa ushyraǵanyn rastady.
— Jańaqala aýdanynda veterınarlyq pýnktterge 21 jylqynyń ólgeni mal ıeleriniń habarlamasy boıynsha tirkelgenin eskerý kerek. Shyǵynǵa ushyraǵandar sany budan kóp bolýy da yqtımal, — dep naqtylady N.Qusaıynov.
Kaztalov aýdany aýyl sharýashylyǵy bóliminiń basshysy Amanjol Qajyǵalıevtiń aıtýynsha, turǵyndardan maly shyǵynǵa ushyraǵany jóninde resmı habarlama túspegen.
— Kıikter kóbirek mekendeıtin Saryózen boıyna jaqyn ornalasqan aýyldyq okrýgterde jylqy maly da túgeldeı qolǵa qarady. Óıtkeni jaıylys joq. Ótken jyly 328 690 tonna pishen, 31 400 tonna jem daıyndaldy, bul — qajetti mal azyǵynyń 86,4 paıyzyn qurady. Aýdanda shabyndyq shyǵymy tómen bolǵandyqtan, kórshiles Aqjaıyq, Tasqala aýdandarynan shóp shabýǵa týra keldi. Qazirgi kezde jem Oral qalasynan tasymaldanyp jatyr. Aýdanda 357 qystaq bolsa, 187 712 bas shartty mal basy qysqa kirdi, — dedi A.Qajyǵalıev.
Bókeı ordasy jáne Jánibek aýdandarynyń ákimderi Nurlybek Daýmov pen Tımýr Shınııazov mal qystaǵynyń qalypty ótip jatqanyn jetkizdi.
BQO aýyl sharýashylyǵy basqarmasynyń basshysy Jasulan Halıýllınniń málimdeýinshe, oblysta mal qystaǵy boıynsha shtab jumys jasap jatyr. Jalpy jaǵdaı baqylaýda, aýdandar boıynsha mal shyǵyny naqtylanyp jatyr.
— Jylqy kóbine qystan tebindep jaıylyp shyǵady dep, oǵan kerekti mal azyǵyn eseptemeıtinder bar. Degenmen, Jánibek aýdanynyń sharýa qojalyqtary bul jaǵyn da eskerip, jem-shópti barynsha mol daıyndaǵan. Osy baǵytta aýdandarda aldyn ala túsindirý jumystary júrgizildi. Qazir barlyq aýdanda sattyqqa jem-shóp bar, tasymaldaý uıymdastyrylǵan. Másele týyndaǵan jaǵdaıda ony jedel sheshý baǵytynda sharalar qabyldanady, — dedi J.Halıýllın.
Eske sala keteıik, budan buryn BQO-da bir úıir jylqynyń sorǵa batyp ólgeni ras pa sony jazǵan edik.