Batys Qazaqstanda jylytý maýsymy qazan aıynyń alǵashqy jartysynda bastalady

ORAL. KAZINFORM — Batys Qazaqstan oblysynda jylytý maýsymyna daıyndyqty 15 qazanǵa deıin tolyq aıaqtaý kózdelip otyr. 

BQO energetıka jáne turǵyn úı-kommýnaldyq sharýashylyq basqarmasynyń basshysy Beıimbet Mýsınniń Kazinform tilshisine málim etkenindeı, óńirde jylytý maýsymy aýa raıyna baılanysty qazan aıynyń alǵashqy jartysynda bastalýy qajet. 

Beıimbet Málikulynyń sózine qaraǵanda, úsh táýlik boıy ortasha temperatýra +8 °C jáne odan tómen bolsa, jylý qosylady.

— Aldymen mektep, aýrýhana sııaqty áleýmettik nysandarǵa jylý beriledi. Odan keıin kópqabatty turǵyn úıler jáne óndiristik mekemelerge kezek keledi, — deıdi Beıimbet Mýsın.

Onyń aıtýynsha, qazirgi tańda áleýmettik mekemeler jylytý maýsymyna túgeldeı daıyn. 

Kópqabatty turǵyn úılerge kelsek, jyl saıyn jataqhanalardyń jaǵdaıy alańdaýshylyq týǵyzady. Oral qalasynda osyndaı 5 jataqhana bar.

— Munyń sebebi, jataqhana turǵyndarynyń belsendiligi tómen, basqarý formasy joq. Muny turǵyndar óz qolyna alǵysy kelmeıdi. Negizgi problemasy da osy. Kúni búgin jertóledegi qubyrlaryn «Jaıyqjylýqýat» AQ mamandary qarap, aýystyryńdar dep jatyr. Soǵan baılanysty turǵyndar óz qarajatyn jınastyryp, qubyrlardy aýystyrý jumysymen aınalysýda, — dep qosty Beıimbet Mýsın.

Eske sala keteıik, budan buryn Batys Qazaqstan oblysy jylytý maýsymyna qanshalyqty daıyn ekendigin jazǵan bolatynbyz.