Batys Qazaqstanda Jezbuǵa kólinde balyq qyryldy

ORAL. KAZINFORM — Terekti aýdany Shaǵataı aýyldyq okrýgi Qyzyljar eldi mekeni mańynda Jezbuǵa kólinde balyqtyń qyrylǵany jóninde áleýmettik jelide beınejazba tarady. 

Aýyl turǵyndarynyń sózine qaraǵanda, Jezbuǵa kóliniń jaǵasynda balyq qyrylyp qalǵan. Osy kólden aýyl adamdary balyq aýlaıdy, sýǵa túsip, mal sýarady. Sondyqtan onyń qaýipsiz bolǵany kerek.

Shaǵataı aýyldyq okrýginiń ákimi Rústem Mútıevtiń aıtýynsha, Jezbuǵa kóline 1994 jyldan beri sý kelmep edi. Bıyl sý mol kelip, jaqsy bolyp qaldy.

«Buǵan deıin bizdiń aýyl mańynda Kishi Bobrovyı kólinde de osyndaı jaǵdaı bolyp, shabaqtar óldi. Endi Jezbuǵa kólinde shabaqtar qyrylǵanyn turǵyndar habardar etti. Negizinen móńke shabaqtary, shortannyń shoraǵaılary ólgen. Munyń sebebi, sýdyń astynda baldyr kóp, sodan tunshyǵyp qalǵan sekildi. Úlken Bobrovyı kólinde de balyq ólgen dep estidim. Qazirgi kezde máseleniń mán-jaıy anyqtalyp jatyr», - dedi R.Mútıev.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaev sýdyń quramyn tekserýge mamandardyń jiberiletinin jetkizdi.

BQO orman sharýashylyǵy jáne janýarlar dúnıesin qorǵaý jónindegi aýmaqtyq ınspektsııasynyń basshysy Nurlan Rahymjanovtyń málim etkenindeı, Aqjaıyq orman jáne janýarlar dúnıesin qorǵaý mekemesiniń qyzmetkerleri ólgen balyqtardy jınap alǵan.

«Balyq ınspektsııasynyń ıhtıologtary patologııalyq materıaldy alyp, zertteıdi. Sodan keıin balyqtyń neden ólgeni anyqtalady», - dedi N.Rahymjanov.