Batys Qazaqstanda jergilikti joldar qalaı jóndelip jatyr
ORAL. KAZINFORM — Batys Qazaqstan oblysynda bıyl 44,3 mlrd teńgege 262,7 shaqyrymnan astam jergilikti jáne aýylishilik joldardy jóndeý josparlanyp otyr.
BQO jolaýshylar kóligi jáne avtomobıl joldary basqarmasynyń basshysy Marat Qýanshalıevtiń málim etkenindeı, sonyń ishinde oblystyq (7 joba) jáne aýdandyq mańyzy bar (16 joba) avtojoldarǵa 38,9 mlrd teńge bólinip, 223,9 shaqyrymyn retke keltirý kózdelgen edi.
Onyń sózine qaraǵanda, qazirgi ýaqytta sonyń 118,3 shaqyrymyna asfaltbeton jabyny tóseldi.
Sonymen qatar «Aýyl — el besigi» baǵdarlamasy aıasynda 15 eldi mekenniń aýylishilik joldaryna 5,3 mlrd teńge qaralyp, kúni búgin 38,8 shaqyrymnyń 15,5-ine asfaltbeton jabynyn ornatý aıaqtaldy.
— Jobalyq-smetalyq qujattamaǵa sáıkes qurylystyń tehnıkalyq kúrdeliligi men uzaqtyǵyna baılanysty eki oblystyq jolda qaıta jańartý jumysy jalǵasýda. Atap aıtqanda, Bórli-Aqsaı-Jympıty avtojolyna (68-139 km) osy ýaqytqa deıin 7,3 mlrd teńge ıgerilip, 24,4 shaqyrymyna asfaltbeton tóseldi. Bıyl buǵan (20 km) respýblıkalyq bıýdjetten 7,9 mlrd teńge berilip, qazirgi ýaqytta sonyń 5,8 shaqyrymynyń tómengi qabaty salyndy, — deıdi basqarma basshysy.
Oblys turǵyndarynyń nazaryn aýdaryp otyrǵan taǵy bir baǵyt — Chapaev-Jańaqala-Saıqyn avtojoly (130-191 km) úshin osy ýaqytqa deıin 7,6 mlrd teńge jumsalyp, 31 shaqyrymy asfaltbetonmen jabyldy. 2025 jyly 15 km joldy jóndeý úshin respýblıkalyq bıýdjetten 3,9 mlrd, jergilikti qazynadan 0,4 mlrd qaralǵan edi. Kúni búginge deıin 5,1 shaqyrymǵa tómengi qabaty tóseldi.
Sonymen qatar atalmysh joldyń (307-337 km) 30 shaqyrymyn kúrdeli jóndeýdi ótken jyly qaraǵandylyq «SMÝ-5» JShS utyp alǵan. Alaıda Bókeı ordasy aýdany Bısen aýyly tusynan Jańaqalaǵa qaraı asfalt tóseý mardymsyz bolyp otyr.
— Munyń sebebi ótken jyly «SMÝ-5» kompanııasy jumysty qosalqy merdigerlerge jasatty. Áıtse de aqshalaryn ýaqtyly tólemeı, aralarynda kelispeýshilikter boldy. Bıyl atalmysh kompanııa basqa qosalqy merdigerdi alyp keldi. Eger jyl sońyna deıin jaǵdaıdy túzemese, biz «SMÝ-5» JShS-men qoshtasatyn bolamyz, — dep túsindirdi M.Qýanshalıev.
Basqarma derekterine sáıkes Barbastaý-Aqjaıyq-Inder (93-145 km) jáne Terekti-Aqsaı (51,7-73 km) avtojoldaryn kúrdeli jóndeý jumystary da júrgizilip jatyr.
Eske sala keteıik, budan buryn BQO-da tenderdi jeńip alǵan depýtattyń kompanııasy jol salmaı otyrǵanyn jazǵan edik.