Batys Qazaqstanda Jeńis kúnine oraı 14 maıdangerge 1,5 mln teńgeden berilmek
ORAL. KAZINFORM — Batys Qazaqstan oblysynda bıylǵy Jeńis kúnine oraı 4 828 adamǵa 341,2 mln teńge kóleminde birjolǵy áleýmettik kómek qarastyryldy.
BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Dildásh Isqaqovanyń málim etkenindeı, jyl saıynǵy dástúrli kómek aýdandyq jáne qalalyq máslıhattardyń sheshimderimen bekitilgen «Áleýmettik kómek kórsetý, onyń mólsherlerin belgileý jáne muqtaj azamattardyń jekelegen sanattarynyń tizbesin aıqyndaý qaǵıdalaryna» sáıkes belgilendi.
Dildásh Salaýatqyzynyń sózine qaraǵanda, 2 667 alýshyǵa, sonyń ishinde Ekinshi dúnıejúzilik soǵys ardagerleri men solarǵa teńestirilgen adamdarǵa 151,2 mln teńge járdem beriledi.
Atap aıtqanda, 14 maıdangerge – 1,5 mln teńgeden, Lenıngraad qalasyn qorshaý kezeńinde jumys istegen 2 adamǵa jáne fashıstik lagerdiń 6 tutqynyna – 120 myń teńgeden, qaıtys bolǵan soǵys ardagerleri men solarǵa teńestirilgenderdiń áıelderine (151 adam) – 30 myń teńgeden, 2 494 tyl eńbekkerine 50 myń teńgeden tólenedi.
Basqarma basshysy orynbasarynyń aıtýynsha, 2 161 alýshyǵa, sonyń ishinde «Ardagerler týraly» zańyna sáıkes basqa sanattaǵy azamattarǵa 190 mln teńge bólindi. Aıtalyq, Aýǵanstan urys qımyldarynyń 628 ardageri – 80 myń teńgeden (birinshi tólemderi 15 aqpanda 100 myń teńge kóleminde berildi), tájik-aýǵan ýchaskesinde, Taýly Qarabaqta jáne Irakta bolǵan 683 áskerı qyzmetshi 100 myń teńgeden almaq.
Budan bólek, Chernobyl atom-elektr stansasyndaǵy apat saldaryn joıýǵa qatysqandar men solardyń ishinde múgedektik taǵaıyndalǵandarǵa – 100 myń teńgeden, qaıtys bolǵan múgedekterdiń otbasylaryna 60 myń teńgeden (barlyǵy – 381 adam) qaraldy. Sondaı-aq Semeı ıadrolyq polıgonyndaǵy synaq saldarynan múgedek bolǵan 213 adamǵa – 100 myń teńgeden, beıbit kezde qaza tapqandar otbasylaryna (198 adam) – 60 myń teńgeden, KSRO-ny qorǵaý kezinde jaralanýy saldarynan múgedektik belgilengen 52 áskerı qyzmetshige 100 myńgeden kómek beriledi.
«Ataýly kúnder men mereke kúnderine oraı áleýmettik kómek alýshylardan ótinishter talap etilmeıdi. Járdem ýákiletti uıymnyń tizimderi negizinde kórsetiledi. Tólemder 1 mamyrǵa deıin tolyqtaı júrgiziletin bolady», dedi D.Isqaqova.
