Batys Qazaqstanda jeke sot oryndaýshyǵa qatysty qylmystyq is qozǵaldy
ASTANA. KAZINFORM — Batys Qazaqstan oblysynyń prokýratýrasy jeke sot oryndaýshysynyń qyzmetinde zań buzýshylyqtardy anyqtady. Bul týraly Bas prokýratýra málim etti.
Batys Qazaqstan oblysynyń prokýratýrasy jeke sot oryndaýshylarynyń qyzmetine júrgizilgen tekserý barysynda atqarýshylyq is júrgizý týraly zańnama talaptarynyń buzylǵanyn anyqtady.
— Jeke sot oryndaýshysy atqarýshylyq is júrgizý sheńberinde túsken aqshalaı qarajatqa bılik etý tártibin buzyp, óndirip alýshylarǵa tıesili 532 myń teńgeni aýdarmaǵan, sondaı-aq 9,8 mln teńgeni negizsiz úshinshi tulǵanyń shotyna aýdarǵan, — delingen habarlamada.
Atalǵan faktiler boıynsha Qazaqstan Respýblıkasy Qylmystyq kodeksiniń 251-baby («Jeke sot oryndaýshysynyń ókilettikterin teris paıdalaný») boıynsha sotqa deıingi tergep-tekserý bastaldy.
Tergep-tekserý barysy prokýratýranyń baqylaýynda. Tergeý nátıjeleri boıynsha qatysy bar tulǵalardyń áreketterine quqyqtyq baǵa berilip, zańda kózdelgen sharalar qabyldanatyn bolady.
Eske sala keteıik, jaqynda sot oryndaýshylar jumysy týraly zań maquldandy.
