Batys Qazaqstanda jaz kezinde 620-ǵa jýyq lager jumys isteıdi

ORAL. KAZINFORM – Batys Qazaqstan oblysynda bos ýaqytty uıymdastyrýdyń ár túrli baǵytymen jaz kezinde 111 myń oqýshy qamtylady. 

BQO bilim basqarmasy basshysynyń orynbasary Aqjarqyn Temirhanovanyń óńirlik kommýnıkatsııa qyzmeti alańynda ótken brıfıngide málim etkenindeı, bul – óńirdegi 1-10 synyp oqýshylarynyń 96 paıyzy.

Onyń sózine qaraǵanda, 1 maýsymda bastalatyn shákirtterdiń jazǵy demalysy kezinde túrli baǵyttaǵy 617 lager jumys isteıdi. 

– Jetim jáne ata-ana qamqorlyǵynsyz qalǵan, sondaı-aq az qamtylǵan otbasy balalaryn túgeldeı, múmkindigi shekteýli jetkinshekterdiń 94, devıantty minez-qulyqty oqýshylardyń 98,2 paıyzyn jazǵy demalyspen qamtý josparlanyp otyr. Oblys boıynsha 111 479 oqýshy nemese 96,6 paıyzy jazda jumys istemek, - dedi A.Temirhanova.

Onyń aıtýynsha, «Qazaqstan halqyna» qoǵamdyq qorynan 271 oqýshyǵa kvota berilgen. Balalardyń demalysyn qaýipsiz jáne tıimdi uıymdastyrý jumystary baqylaýǵa alyndy. 

– Qazirgi tańda oblys boıynsha Halyqaralyq balalardy qorǵaý kúnine oraı túrli is-sharalar ótkizilýde. Bul rette oıyn-saýyqqa ǵana emes, onyń áleýmettik mán-mańyzyna nazar aýdaryldy. Mundaı is-sharalarmen 120 myńnan astam bala qamtylmaqshy, - dedi A.Temirhanova.

Eske sala keteıik, budan buryn Batys Qazaqstanda 106 myńnan astam oqýshynyń jazǵy demalyspen qamtylatynyn jazǵan edik.