Batys Qazaqstanda «Jaıly mektep» jobasy aıasynda 3 mektep paıdalanýǵa berilmek

ORAL. KAZINFORM – Batys Qazaqstan oblysynda jyl sońyna deıin «Jaıly mektep» ulttyq jobasy aıasynda úsh mektep paıdalanýǵa berilmek.

BQO qurylys basqarmasynyń basshysy Álibek Antazıevtiń óńirlik kommýnıkatsııalar qyzmeti alańynda ótken brıfıngide málim etkenindeı, atalmysh joba boıynsha 2023-2025 jyldary jalpy 8 myńnan astam oqýshylarǵa arnalǵan 9 mektep qurylysy josparlanǵan bolatyn. 

Onyń sózine qaraǵanda, bıylǵy qarasha aıynda Oral qalasynda Derkól kentinde 1 500 oryndyq, jeltoqsanda «Balaýsa» shaǵynaýdanynda 1 500 oryndyq, sondaı-aq Terekti aýdany Podstepnyı aýylynda 1 200 oryndyq jańa mektep iske qosylmaq.

«Qalǵan alty jaıly mekteptiń qurylysy 2025 jyly aıaqtalatyn bolady. Atap aıtqanda, Bórli aýdany Pýgachev aýylynda 300, Aqsaı qalasynda 900 jáne 300 oryndyq, Báıterektiń Dostyǵynda 1 200, Baıqonysynda 600 oryndyq, Oralda Jáńgir han kóshesinde 600 oryndyq mektep boı kóterýde», - dedi Á.Antazıev.

Basqarma basshysynyń aıtýynsha, budan bólek bilim berý ınfraqurylymyn qoldaý qorynyń qarajaty esebinen Oral qalasynda 400 oryndyq № 31 mektep qurylysyn aldaǵy jeltoqsan aıynda bitirý kózdelip otyr. Sondaı-aq Oral qalasynda № 8 mektep salý josparda. Oǵan qarajat bólý máselesi qarastyrylyp jatyr. 

Basqarma málimeti boıynsha óńirde bıyl áleýmettik sala nysandarynyń qurylysyna respýblıkalyq jáne jergilikti bıýdjetten 30,7 mlrd teńge bólingen. 

Eske sala keteıik, budan buryn Batys Qazaqstanda «Jaıly mektep» jobasy qalaı júzege asyrylyp jatqanyn jazǵan bolatynbyz.