Batys Qazaqstanda Jaıyq sýy eń joǵary deńgeıge kóterildi

ORAL. KAZINFORM – Batys Qazaqstan oblysynda Jaıyq ózenindegi sý deńgeıi Aqjaıyq aýdany Taıpaq aýyly tusynda 899 santımetrge (qaýipti shegi – 850 sm) jetti. 

«Qazgıdromet» RMK BQO fılıalynyń 5 mamyr kúngi saǵat 08.00-degi málimeti boıynsha Taıpaq gıdrobeketinde bir táýlikte sý deńgeıi 42 santımetrge kóterildi. 

Bıylǵy 22 sáýirde Jaıyqtyń deńgeıi Oral qalasy tusynda 865 santımetrge jetken edi. Taıpaqta odan 34 santımetrge asyp ketip otyr. 

Esesine Jaıyq ózeni boıyndaǵy basqa gıdrobeketterde sý deńgeıi túsýde. Atap aıtqanda, Báıterek aýdany ıAnvartsev aýylynda bir táýlikte 8 (800 sm, qaýipti shegi – 1 250 sm), Oral qalasynda 7 (792 sm, 850 sm), Kóshimde 5 (813 sm) santımetrge tómendedi. Sondaı-aq Kóshim kanalynda birden 22 santımetrge tústi.

Eske sala keteıik, budan buryn Batys Qazaqstan oblysynda jańadan sý qoımalary qashan salynatynyn jazǵan bolatynbyz. 

Sondaı-aq Oral qalasynda sýǵa ketken barlyq saıajaı tehnıkalyq tekserýden ótedi.