Batys Qazaqstanda jaýǵan qar qyzǵaldaqty basyp qaldy
ORAL. KAZINFORM — Batys Qazaqstan oblysynda «besqonaq» kelisimen kún jaýyn-shashyndy bolyp tur.
Aldymen 8 sáýir kúni jańbyr jaýsa, 10-yna qaraǵan túni qarǵa ulasty.
Turǵyndardyń sózine qaraǵanda, oblystyń ońtústik aýdandarynda qar dalany basyp qalǵan.
Bókeı ordasy aýdany Bısen aýyldyq okrýginiń turǵyny Jaqsylyq Moldashevtiń aıtýynsha, qar 10 sáýir kúni tańǵy saǵat 04.00 shamasynda bastalyp, 8-derde ashylǵan.
- Qar dalada ósip turǵan qyzǵaldaqty basyp qaldy. Endi úsip ketedi-aý dep alańdap turmyz. Maldy da qamap jatyrmyz, - deıdi Qaroı qystaǵynda turatyn J.Moldashev.
Oblys ortalyǵy Oral qalasynda da tańnan bastap qar jaýdy. Jerge túsken qar erip jatyr.
Budan buryn «Qazgıdromet» RMK-nyń málimetine sáıkes BQO TJ departamenti eskertý jarııalaǵan bolatyn. Onda 10 sáýir kúni túnde oblystyń batysy men soltústiginde 3 gradýs úsik soǵýy múmkin ekendigi habarlandy. Sondaı-aq jańbyr men qar jaýǵandyqtan, onyń sońy kóktaıǵaqqa ulasýy yqtımal.
- Bókeı ordasy aýdany Han ordasy aýylynda da túnde qar jaýdy. Qazir erip jatyr. Jalpy, 8 sáýirde kiretin besqonaqtyń jaýyn-shashyndy bolǵany – jaqsy yrym. Óıtkeni kóktem men jazda jańbyr jaýmasa, shóp durys óspeıdi, kóktegeni erte qýrap ketedi. Ásirese, mal ustaǵan aǵaıynǵa qıyn. Sońǵy jyldary óńirimizdiń qýańshylyqqa ushyrap júrgeni jasyryn emes. Sondyqtan jańbyr jaýa tússe eken dep otyr eldegi aǵaıyn, - dedi Han ordasy aýylynyń turǵyny Baqytqanym Mızambaeva.
Eske sala keteıik, budan buryn Jaıyqtaǵy sý deńgeıi Oral qalasyndaǵy gıdrobekette 460 santımetrge jýyqtaǵanyn jazǵan bolatynbyz.