Batys Qazaqstanda jasóspirimderge qatysty qylmys 75 paıyzǵa ósip otyr

ORAL. KAZINFORM — Batys Qazaqstan oblysynda kámeletke tolmaǵandar jasaǵan qylmys 30 paıyzǵa (30-dan 39-ǵa) kóbeıip ketken.

BQO polıtsııa departamentiniń bastyǵy, polıtsııa polkovnıgi Arman Orazalıevtiń málim etkenindeı, sonyń 27-si nemese kópshiligi – múliktik qylmystar (14-i – bopsalaý, altaýy – urlyq, beseýi – tonaý, ekeýi – alaıaqtyq). 

Arman Moldııarulynyń sózine qaraǵanda, jasóspirimderge qatysty qylmys 75 paıyzǵa (49-dan 86-ǵa) ósse, sonyń 26-sy – jynystyq tıispeýshiligine qarsy qylmystar. 

- Jazǵy demalys kezeńinde kámeletke tolmaǵandardyń túngi ýaqytta eresekterdiń qaraýynsyz turǵyn-jaıdan tys jerlerde júrýi kóbeıedi. Jyl basynan beri 2 774 derek anyqtalyp, zańdy ókilderi jaýapkershilikke tartyldy. Oǵan qosa 35 kásipkerlik sýbektisine balalardyń oıyn-saýyq oryndarynda bolýyna jol bergeni úshin ákimshilik hattama toltyryldy. Polıtsııa departamenti tarapynan jumystar kúsheıtildi. Barlyq lagerde, sý aıdyndarynda, demalys saıabaqtarynda, oıyn-saýyq ortalyqtarynda, kóshelerde quqyqtyq tártipti qamtamasyz etý úshin qajetti sharalar qabyldanyp jatyr, - dedi A.Orazalıev.

Onyń aıtýynsha, balalardyń qatysýymen bolatyn jol-kólik oqıǵalarynyń kóbeıýi alańdaýshylyq týǵyzýda. Bes aıda 146 jol apaty (2024 jyly osy merzimde – 88) tirkelip, sonyń saldarynan 173 bala (101) túrli dene jaraqatyn aldy. Ókinishke qaraı, tórteýi (6) kóz jumdy. 

- Báıterek aýdanynda avtokólik apaty oryn aldy, onda jasóspirim kólikti basqaryp, saldarynan oqıǵa ornynda júrgizýshi men jolaýshy qaza tapty, olar – 9 jáne 10 synyp oqýshysy. Osyǵan baılanysty balalardy baqylaýsyz qaldyrmaý kerektigin eske salamyz. Balanyń qaýipsizdigi – ár ata-ananyń tikeleı mindeti, - dedi departament bastyǵy.

Eske sala keteıik, budan buryn BQO-da balasy túngi ýaqytta júrgeni úshin 2 300-ge jýyq ata-ananyń jaýapqa tartylǵanyn jazǵan bolatynbyz.